Lajme

Presidentja Osmani shpërndan fotografi nga ceremonia lamtumirëse e Madeleine Albright

Autori: Gazeta inFokus 21:11 | 27 April 2022

Presidentja e Kosovës, Vjosa Osmani mori pjesë në ceremoninë lamtumirëse të Sekretares së Shtetit të SHBA-së, Madeleine Albright.

Në këtë ceremoni të pranishëm ishin edhe kryeministri i Kosovës, Albin Kurti dhe ish-presidentja Atifete Jahjaga.

Osmani ka shpërndarë disa fotografi nga kjo ceremoni në rrjetin social facebook, ku krahas tyre shkroi se Kosova është përgjithmonë falënderuese për kontributin e jashtëzakonshëm të sekretares Albright për t’i dhënë fund gjenocidit serb në Kosovë, si dhe mbështetjes së saj të vazhdueshme për Kosovën e lirë, të pavarur, të zhvilluar e me vendin e merituar në arenën ndërkombëtare.

“Sot, në Washington D.C., i dhamë lamtumirën e fundit mikes së madhe të Kosovës, gardianes së lirisë e demokracisë dhe zërit të fuqishëm të popullit tonë, Madeleine Albright.

Sekretarja Albright e njohu dhimbjen e popullit tonë, e ne do ta vazhdojmë përpjekjen e saj, për ta avancuar dhe për ta mbrojtur demokracinë! Miqësinë me Amerikën e kemi të përjetshme, siç do ta kemi kujtimin për Sekretaren Albright”, shkroi Osmani.

Po ashtu, Presidentja Osmani dhe kryeministri Kurti kanë takuar Sekretarin e Shtetit Antony Blinken në Washington DC.

Të tjera