Lajme

Presidenti i KiE: E ardhmja e Evropës është më e sigurt me Ballkanin Perëndimor

Autori: Gazeta inFokus 12:09 | 06 December 2022

Presidenti i Këshillit Evropian, Charles Michel ka thënë se e ardhmja e Bashkimit Evropian është më e sigurt me Ballkanin Perëndimor. Para nisjes së samitit në Tiranë, ai ka deklaruar se sot do të nënshkruhen marrëveshje të rëndësishme në mbështetjeve të vendeve të Ballkanit Perëndimor.

Ai tha se për herë të parë në rajon po organizohet takim mes Bashkimit Evropian dhe Ballkanit Perëndimor.

“Ky do të jetë një takim i rëndësishëm, një takim simbolik. Është hera e parë që mbajmë një samit të BE-së dhe Ballkanit Perëndimor këtu në një vend të rajonit. Jam absolutisht i bindur që e ardhmja e fëmijëve tanë do të jetë më e sigurt dhe më e begatë me Ballkanin Perëndimor brenda BE-së. Dhe po punojmë fort në mënyrë që të shënojmë përparime. Sot për shembull do të nënshkruajmë një marrëveshje për tarifat roaming dhe është një arritje konkrete në përputhje me atë çfarë kemi diskutuar në Brdo një vit më parë. Që do të thotë për bizneset, për turizmin. Ky është një hap shumë i rëndësishëm në drejtimin e duhur. Një tjetër element i rëndësishëm është mbështetja që duam të sjellim Ballkanit Perëndimor në raport me krizën energjetike dhe vështirësitë energjetike që janë pasojat e agresionit të Rusisë ndaj Ukrainës. Kjo tregon angazhimin tonë për të forcuar integrimin, bashkëpunimin me rajonin”, ka thënë ai.

Ai ka shtuar se edhe reformat janë të nevojshme dhe se është me rëndësi etapa e afrimit me rajonin.

“Jemi shumë të bindur që e ardhmja e Evropës dhe e ardhmja e fëmijëve tanë do të jetë më e sigurt dhe më e begatë me Ballkanin Perëndimor pjesë të Evropës. Gjithashtu, progresi, reformat janë të nevojshme. Gjithsecili duhet të përmbush përgjegjësitë e veta dhe natyrisht kjo është një etapë konkrete e afrimit me rajonin dhe kjo është e rëndësishme për ne”, ka shtuar ai.

Në këtë samit, Kosova po përfaqësohet nga presidentja Vjosa Osmani, e cila ka theksuar nevojën e përshpejtimit të procesit të integrimit.

 

Të tjera

Fokusi

lajme