Në këtë fillimvit, pas publikimit të logos zyrtare të 10 vjetorit të pavarësisë nga Presidenti Thaçi më 1 janar, u komentua shumë rreth simbolikës së saj.

Disave u dukej si diell, të tjerëve si shqiponje apo krahë të ndarë shqiponje, shpinë për shpinë, sikur simbolikë e dy shteteve që ia ruajnë shpinën njëri-tjetrit, ndërsa disa të tjerëve nuk u dukej fare që kishte ndonjë simbolikë të rrugëtimit që na solli deri te ky jubile, i cili sivjet organizohet nën patronatin e Presidentit të Kosovës.

Organizimet për këtë manifestim tashmë kanë filluar dhe zyrtarë të Presidencës, që janë edhe pjesë e Këshillit Organizativ, për KosovaPress kanë treguar se festa e pavarësisë sivjet do të zgjas 10 ditë, nga data 8 deri më 18 shkurt, si simbolikë e 10 vjetorit të pavarësisë.

“Deri më tash publike është bërë logoja zyrtare e organizimeve institucionale që do të bëhen për këtë 10 vjetor të shtetësisë sonë. Logoja është derivat i simboleve zyrtare shtetërore, ngjyrave zyrtare, por natyrisht që e ka edhe simbolikën e vet. Pjesë përbërëse e logos është ngjyra e kaltër, ngjyra e artë dhe e bardha, të cilat janë edhe ngjyrat e flamurit tonë shtetëror. Forma e logos, me dy duar të hapura dhe dhjetë gishta, përveçse nënkupton ditëlindjen e dhjetë të shtetit tonë, nënkupton edhe 10 vjet kontribut në paqen rajonale dhe si formë i ngjan edhe fishekzjarreve të cilët janë sinonim i festave kudo në botë. Në formën e logos ka elemente edhe të hartës së Kosovës dhe formës së saj, por ideatorët e kanë përfshirë edhe formën e yllit polar. Gjashtë yjet që në flamurin tonë shtetëror simbolizojnë gjashtë grupimet etnike më të mëdha që jetojnë në Kosovë janë paraqitur si gjashtë rr eze ndriçuese për rreth logos, derisa dy vijat vertikale në mes të logos janë cepe të skajshme të hartës sonë”, ka sqaruar këshilltari politik i Thaçit, Adil Behramaj.

Këshilltari i Thaçit nuk ka dashur t’i komentojë deklaratat e Jakup Krasniqit dhe të tjerëve rreth logos, duke thënë se si Këshill Organizativ kanë përgjegjësi organizative dhe do të mundohen të qëndrojnë sa më larg komenteve politike.

“Ne i falënderojmë të gjithë për vlerësimet e tyre, për komentet e tyre, si kritikët e logos, ashtu edhe ata që e kanë pëlqyer, të cilat natyrisht se kanë rëndësi për ne. Është e kuptueshme që secili mund të ketë shije të ndryshme artistike dhe preferenca të veta personale. Interpretimet janë të lira, nuk ka nevojë ta reduktojë askush imagjinatën vetëm në kuptimin që kanë dashur t’i japin krijuesit, sepse secili mund ta shoh logon edhe prej pikëpamjes së vet dhe mund të ketë edhe gjetje të tjera rreth saj”, ka thënë Behramaj, duke shtuar se megjithatë ky është versioni dhe kjo është simbolika zyrtare e logos së dhjetëvjetorit të pavarësisë.

Ai ka thënë se në të ardhmen, sapo të konkretizohet tërësisht, do të bëhet publik edhe programi festiv.

BKT Kosova dhe Komiteti Olimpik i Kosovës nënshkruajnë vazhdimin e marrëveshjes së sponsorizimit për periudhë 10-vjeçare

Sponsoruar