Fokus

Presidenca çeke jep detaje ekskluzive për Infokus – Kur do të mbahet trialogu dhe çfarë do të ndodhë për liberalizimin e vizave?

Autori: Gazeta inFokus 15:43 | 06 December 2022

Me 22 nëntor, përfaqësuesit e vendeve anëtare të BE-së u pajtuan me propozimin që liberalizimi i vizave për Kosovën të hyjë në fuqi me 1 janar të vitit 2024. Mirëpo për të ardhur deri te lëvizja e lirë e kosovarëve në Evropë ekzistojnë edhe disa procedura të cilat duhet të përmbushen.

Një ndër to apo hapi i radhës është organizimi i trialogut në mes të Komisionit Evropian, Këshillit Evropian dhe Parlamentit Evropian në përpilimin e tekstit përfundimtar për liberalizimin i cili më pas nënshkruhet nga përfaqësuesit e këtyre tre institucioneve.

Nga zyra për informim e presidencës çeke për Gazetën Infokus kanë dhënë detaje sa i përket këtij takimi trepalësh. Ata kanë deklaruar se janë duke u munduar të zbulojnë nëse trialogu në mes të KE-së dhe PE-së do të mund të organizohet në kohën sa Çekia është ende në krye të Këshillit të Bashkimit Evropian.

Ata kanë deklaruar se janë të gatshëm për këtë takim dhe se kanë edhe një datë, por që janë duke pritur nga Komisioni Evropian ti konfirmojë datën.

LEXO EDHE: Presidenca çeke jep detaje për Infokus: “Ky do të jetë hapi i radhës që 1.1.2024 të jetë data e dhënies së vizave për Kosovën”

“Presidenca jonë aktualisht po përpiqet të zbulojë nëse do të ishte e mundur të organizohej trialogu i parë me PE gjatë Presidencës sonë. Padyshim që jemi gati për të filluar, vetëm në pritje të konfirmimit të datës me PE”, kanë thënë për Infokus nga zyra për informim e presidencës ceke.

Në këtë mbledhje e cila po synohet të  mbahet para se Çekisë ti përfundoje mandati 6 mujor në kryesi të KE-së, pritet të arrihet një marrëveshje në mes të tre palëve përfshirëse.

“Për të arritur liberalizimin e vizave për Kosovën, tani Këshilli, PE dhe Komisioni Evropian duhet të përparojnë për të gjetur një marrëveshje në negociatat përfundimtare të quajtur trialog. Teksti përfundimtar do të dalë nga këto negociata politike”, ka thënë për Infokus, zëdhënësja e presidencës çeke, Eva Hrncirova.

Pasi që të arrihet kjo marrëveshje dhe të nënshkruhet nga të gjitha palët hapi i radhës është publikimi në Gazetën Zyrtare dhe pas publikimit edhe hyn në fuqi liberalizimi i vizave e lëvizja e lirshme e qytetarëve të Kosovës në shtetet e BE-së.

Mirëpo derisa të arrihet në këtë fazë, Kosova duhet të jetë pjesë edhe e Sistemit të ri Evropian të Informacionit dhe Autorizimit të Udhëtimit (ETIAS), kusht ky i cili u propozua nga Franca dhe u pranua edhe nga shtetet tjera anëtare.

Edhe pasi Kosova të marrë statusin e liberalizimit dhe të bëhet pjesë e sistemit ETIAS, duhet të respektojë një numër treguesish të sigurisë dhe imigracionit në mënyrë që të ruajë statusin pa viza.

“Për të marrë dhe për të ruajtur statusin pa viza, Kosova ra dakord të respektojë një numër treguesish të sigurisë dhe imigracionit. Fakti që po diskutojmë për liberalizimin e vizave tregon se ka një përpjekje të konsiderueshme nga ana e Kosovës për të rritur bashkëpunimin e ndërsjellë. Në mënyrë që qytetarët individualë të përfitojnë nga udhëtimi pa viza në BE, ata duhet të pajisen me pasaporta biometrike. Në të njëjtën kohë, deri në kohën e liberalizimit të vizave, duhet të jetë në funksion Sistemi i ri Evropian i Informacionit dhe Autorizimit të Udhëtimit (ETIAS), prandaj qytetarët e Kosovës do të duhet të aplikojnë për këtë autorizim”, ka deklaruar, zëdhënësja Hrncirova.

LEXO EDHE: “Ky është një lajm i madh për Kosovën”, presidenca çeke konfirmon për Infokus dritën jeshile për liberalizimin e vizave

Kosovarët vazhdojnë të jenë të vetmit në Ballkan që duhet të pajisen me viza për të udhëtuar në shtetet e Bashkimit Evropian. Ky proces i lodhshëm për Kosovën ka filluar tash e 12 vite. Derisa pajtimi nga shtetet anëtare për propozimin që 1 janari 2024 të jetë data kur Kosovës i hiqen vizat është deri më tash procesi më pozitiv dhe hapi më i rëndësishëm që ka ndodhur në këtë aspekt./Gazeta Infokus/

 

Të tjera