Tashmë edhe pas takimit me ambasadorët e QUINT-it, Qeveria, Presidenca dhe Kuvendi kanë dalë me deklaratë të përbashkët kundër referendumit të Serbisë në Kosovë.

Kjo komunikatë e përbashkët erdhi menjëherë pas takimit ku thuhet se referendumi është në kundërshtim me Kushtetutën e Kosovës.

“Kushtetuta e Kosovës, ligjet e aplikueshme në Kosovë si dhe e drejta ndërkombëtare dhe praktika ndërkombëtare nuk e njohin të drejtën e një shteti për të realizuar referendum në territorin sovran të një shteti tjetër. Prandaj, praktikat e deritanishme të aplikuara që nga viti 2012, kanë qenë kundërkushtetuese, e si rrjedhojë nuk i obligojnë institucionet e tanishme të Republikës së Kosovës të dala nga vullneti i qartë i qytetarëve i shprehur më 14 shkurt 2021. Aq më tepër kur këto praktika kanë rezultuar vetëm me fuqizimin e strukturave ilegale të Serbisë në Kosovë”, thuhet në komunikatë.

Derisa mbrapa këtij mendimi qëndrojnë edhe opozita. Pra opozita kanë deklaruar se janë pranë kryeministrit Kurti dhe presidentes Osmani në këtë vendim.

Kështu ka deklaruar kreu i PDK-së, Memli Krasniqi, lideri i LDK-së, Lumir Abdixhiku dhe i pari i AAK-së, Ramush Haradinaj.

Abdixhiku tha se një referendum i tillë është i papranueshëm për partinë e tij.

“Lidhja Demokratike e Kosovës e sheh të papranueshëm mbajtjen e çfarëdo referendumi të një shteti tjetër në territorin e Republikës së Kosovës. Kushtetuta e Kosovës, ligjet e Kosovës dhe praktikat ndërkombëtare, janë të qarta në këtë drejtim. Prandaj ne presim dhe mbështesim respektimin e këtyre normave në plotni.”, ka shkruar Abdixhiku.

Derisa Haradinaj referendumin e ka cilësuar sulm flagrant mbi sovranitetin e Kosovës.

“Pretendimi i Serbisë që të organizojë referendum kushtetues në territorin e Kosovës është sulm flagrant mbi sovranitetin dhe integritetin e kushtetutës së Kosovës”, ka shkruar Haradinaj.

E edhe Krasniqi e quajti të papranueshëm mbajtjen e referendumit serb në Kosovë.

“Partia Demokratike e Kosovës konsideron se mbajtja e referendumit të Serbisë në Kosovë është antikushtetuese dhe kjo do të përbënte shkelje flagrante të sovranitetit të Republikës së Kosovës. Ka dallim esencial ndërmjet zgjedhjeve dhe referendumit, andaj është i papranueshëm lejimi i votimit në Kosovë për referendumin e nje shteti fqinj”, tha Krasniqi për Gazetën Express.

E gjithë kjo erdhi pas kërkesës nga shtetet e QUINT-it që Kosova të pranojë mbajtjen e referendumit të Serbisë në Kosovë.

E përkundër këtij presioni, pozita dhe opozita në Kosovë kanë vendosu të mos dorëzohen. Në lidhje me këtë nesër pritet të mbahet seanca e jashtëzakonshme e Kuvendit të Kosovës.

Qytetarët e Serbisë, më 16 janar, do të deklarohen me “po” apo “jo” për një pyetje: “A jeni për konfirmimin e aktit për ndryshimin e Kushtetutës së Republikës së Serbisë?”.

Ndryshimet kanë të bëjnë me gjyqësorin dhe Serbia është obliguar për to në procesin e anëtarësimit në Bashkimin Evropian. Siç kanë shpjeguar vazhdimisht përfaqësuesit e BE-së, qëllimi i ndryshimit të kushtetutës së Serbisë është që të arrihet një gjyqësor i pavarur, pa ndikim politik dhe për sundim të ligjit./Gazeta Infokus/