Lajme

Policia gjermane arreston 30-vjeçarin shqiptar dhe gruan e tij

Autori: Gazeta inFokus 15:34 | 12 July 2023

Mediat gjermane raportuan se policia dje ka mësyrë banesën e një çifti në Solingen, ku ka gjetur armë zjarri.

Thuhet se forcat speciale (SEK) mësynë një apartament në Broßhauser Straße në Ohligs të martën në mëngjes dhe arrestuan një burrë dhe një grua. Në banesë u gjetën edhe një numër armësh zjarri.

Megjithatë, ky zbulim mund të përfaqësojë vetëm “majën e ajsbergut”, pasi dy të arrestuarit dyshohet se kanë qenë aktivë kriminalë në fusha të ndryshme në të kaluarën. Bashkëshorti 30-vjeçar shqiptar akuzohet për shkelje të ligjit për narkotikët, ndërsa bashkëshortja 30-vjeçare, shtetase gjermane, mësohet se ka përvetësuar para nga klientët si punonjëse e një institucioni financiar.

-Advertisement-

Zyra e prokurorit publik të Wuppertal, e cila ishte përgjegjëse për operacionin në Ohligs, fillimisht nuk njoftoi se cila kompani bankare ishte e përfshirë. Megjithatë, u raportua se shumat janë mjaft të konsiderueshme. “Thuhet se janë disa qindra mijëra euro”, tha prokurori i lartë publik përgjegjës Wolf-Tilman Baumert më vonë, përcjell albinfo.ch.

Policia hyri befasisht në banesën e çiftit, të cilët u gjetën të papërgatitur dhe nuk bënë rezistencë. Më pas policia bastisi shtëpinë e çiftit. U përdorën edhe qentë e policisë, të cilët janë të specializuar për gjurmimin e kartëmonedhave. Gjatë kontrollit, hetuesit gjetën bizhuteri me vlerë. Dhe kur u hap një kasafortë, u zbulua një sasi gjashtëshifrore parash. Sipas njohurive të mëparshme, bëhet fjalë për para të përvetësuara nga 30-vjeçarja.

Shqiptari mësohet se ka vepruar në sasi të mëdha me lëndë narkotike. Gjatë kontrollit në banesë, efektivët sekuestruan tri armët e gjata të përmendura, përveç sasive të vogla të lëndës narkotike. Policia kriminale ka konfiskuar edhe një Mercedes AMG të të dyshuarit.