Lajme

Policia e Kosovës: Nëntë gazetarë u lënduan në Leposaviq, u grabitën një kamerë dhe një telefon

Autori: Gazeta inFokus 18:23 | 16 June 2023

Policia e Kosovës ka thënë se nëntë gazetarë janë lënduar në Leposaviq, pasi të njëjtit u sulmuan me shok-bomba nga protestuesit.

Në njoftim, policia e Kosovës ka potencuar se vetura e ministrit të Administrimit të Pushtetit Lokal, Elbert Krasniqi, është gjuajtur me ngjyrë teksa ishte në dalje nga komuna e Leposaviqit.

“Sot, më 16 qershor 2023, pranë komunës së Leposaviqit, nga persona të dyshuar, është sulmuar me mjete të ndryshme (ngjyrë), automjeti zyrtar, i cili ishte në shoqërim të ministrit të Ministrisë për Administrim të Pushtetit Lokal të RKS-së, i cili ishte në dalje nga komuna e Leposaviqit pasi i njëjti ka qenë me detyrë zyrtare në komunë”, thuhet në njoftim.

-Advertisement-

“Po ashtu në afërsi të komunës së Leposaviqit nga individ/grupe kriminale është hedhur një mjet, dyshohet shok bombë, si dhe janë sulmuar fizikisht në mënyrë brutale disa gazetarë të mediumeve të ndryshme të Kosovës. Bazuar në informacionet e deritanishme bëhet fjalë për nëntë gazetarë të sulmuar të cilët kanë qenë me detyrë zyrtare duke përcjellë zhvillimet pranë komunës së Leposaviqit, ku disa prej tyre përveç shqetësimeve kanë pësuar edhe lëndime të ndryshme trupore, si dhe kanë pranuar tretman mjekësor”.

Policia gjithashtu njoftoi se veç dhunës ndaj gazetarëve, atyre iu janë dëmtuar edhe pajisje të ndryshme të xhirimeve.

“Përveç sulmeve fizike dhe dhunës së ushtruar ndaj gazetarëve, atyre iu janë dëmtuar pajisje të ndryshme të xhirimeve, ku njërit prej tyre iu është grabitur kamera zyrtare e mediumit, përderisa tjetrit iu është grabitur një telefon celular”.

“Pengimi i gazetarëve në kryerje të detyrës, cenimi i shprehjes së lirë, pengimi i pasqyrimit të situatës reale, sulmet e dhuna fizike, si dhe dëmtimi i automjeteve dhe i pajisjeve zyrtare janë veprime kriminale të cilat do të hetohen nga Policia e Kosovës. Në bashkëpunim dhe koordinim me organet e drejtësisë, janë iniciuar rastet sulm ndaj personave zyrtar, asgjësim apo dëmtim i pronës dhe lëndim trupor”.

Subscribe në YouTube: GAZETA INFOKUSI
Etiketa:
Viva Fresh sjell programin XL: 10% zbritje gjatë gjithë vitit!
-Advertisement-

Të tjera

Fokusi

lajme