Policit Haris Kelmendi, i cili kishte ushtruar dhunë mbi 18 vjeçarin Leotrim Rama, brenda stacionit policor në vitin 2018, për të cilin rast u raportua edhe në media, i është ndërprerë masa e arrestit shtëpiak dhe i njëjti është duke u mbrojtur në liri.

Zëdhënësja e Gjykatës Themelore në Prishtinë, Mirlinda Gashi në një prononcim për Telegrafin ka thënë se Departamenti i Përgjithshëm Penal ka pranuar aktakuzën lidhur me të pandehurin H.K dhe sipas saj, seanca fillestare është caktuar të mbahet me datë 18 maj.

Kështu u pritën ushtarët britanikë nga familjet pasi përfunduan shërbimin në Kosovë

-Advertisement-

“Duke ju referuar kërkesës tuaj ju njoftojmë se Gjykata Themelore në Prishtinë – Departamenti i Përgjithshëm Penal ka pranuar aktakuzën lidhur me të pandehurin H.K. Seanca fillestare është caktuar të mbahet me datë 18 maj 2021. Të pandehurit në fjalë i është ndërprerë masa e arrestit shtëpiak dhe i njëjti është duke u mbrojtur në liri”, ka thënë zëdhënësja e Gjykatës Themelore në Prishtinë, Mirlinda Gashi.

Ndryshe, polici Haris Kelmendi kishte ushtruar dhunë mbi 18 vjeçarin Leotrim Rama, brenda stacionit policorë. Krejt kjo kishte ngjarë tri vite më parë.

E menjëherë pas shpërndarjes së një video inçizimi në rrjete sociale u morën edhe masa nga organet e drejtësisë.

I pandehuri Kelmendi u arrestua dhe u mbajt në paraburgim për 48 orë.

E posa plotësoi këtë dënim prokurori Eset Rama e liroi H.K me arsyen se ky i fundit u tregua i sinqertë gjatë deklaratave të përshkrimit të rastit.

Mirëpo lënda nuk u mbyll me kaq pasi që Këshilli Prokurorial vendosi ta suspendojë Ramën si ndëshkim për vendimin e dhënë.

“KPK-ja ka marrë vendim në mënyrë unanime për pezullimin nga puna të prokurorit në fjalë, si dhe ka themeluar Panelin hetimor, i cili do të trajtojë rastin dhe do t’i rekomandojë KPK-së vendimin përfundimtar”, thuhej në njoftim.

E pas suspendimit të prokurorit Rama, prokuroria mori vendim ta kthejë policin H.K sërish në paraburgim. Edhe këtë herë polici nuk qëndroi gjatë.

Kjo pasi që avokati i Haris Kelmendit dërgoi lëndën në Gjykatë të Apelit.

Arbër Jashari, zëdhënës i Gjykatës së Apelit kishte bërë të ditur se polici që ka kryer aktin e dhunshëm mbi Leotrim Ramën u lirua nga paraburgimi dhe të njëjtit iu caktua masa e arrestit shtëpiak në muajin shkurt, në kohëzgjatje prej 30 ditësh.