Lajme

Polemika në Finlandë për festën e shfrenuar dhe vallëzimin erotik të kryeministres: Nuk mora drogë

Autori: Gazeta inFokus 19:59 | 18 August 2022

Polemika për kryeministren e Finlandës, Sanna Marin, pasi një video ku ajo pi, kërcen egërsisht dhe këndon në një festë në shtëpinë e një shoqeje, përfundoi në rrjetet sociale.

Marin, në notat e artistëve rep, të njohur si Petri Nygard dhe Antti Tuisku, nuk kërcen vetëm, por në shoqërinë e fytyrave të njohura të artit finlandez.

Sipas tabloidit “Iltalehti”, ndër të ftuarit e festës që shihen në video dallohen: këngëtarja Alma, influencuesja Janita Autio, prezantuesja televizive Tinni Wikstroem, YouTuberja Ilona Ylikorpi, moderatorja e radios Karoliina Tuominen, stilistja Vesa Silver dhe parlamentarja Ilmari Nurminen e Partisë Socialdemokrate të Marin.

Kryeministrja tha se ishte e zemëruar që “hapësirat private” “janë bërë publike” dhe mohoi të kishte marrë drogë gjatë festës.

Në fakt, në video mund të dëgjohet dikush, që gjatë kërcimeve të egra i referohej “bandës së miellit” – shprehje që lidhet me përdorimin e kokainës. “Nuk e kam idenë pse dikush e përdori këtë shprehje dhe çfarë i referohet”, tha Marin.

Dhe tashmë ka nga ata që drejtojnë gishtin drejt hakerëve të dyshuar rusë, duke pasur parasysh pozicionet e ashpra të Marin kundër Moskës: jo vetëm që – së bashku me presidentin e Finlandës – ka përshpejtuar hyrjen e vendit të saj në NATO, por kohët e fundit ka qenë ndër të parët liderë në Evropë që flasin në favor të ndalimit të turizmit rus në të gjithë Evropën.

Vetëm dy ditë më parë, më 16 gusht, qeveria finlandeze njoftoi se numri i vizave që u jepen rusëve do të reduktohet me 90 për qind duke filluar nga 1 shtatori.

“Sigurisht që nuk do të komentoj se ku janë xhiruar këto video dhe kush i ka xhiruar, sepse janë hapësira private”, tha Marin, duke thënë se është “e pikëlluar që janë bërë publike”.

Marin ishte kritikuar më parë për pjesëmarrjen në një festival rock: kishte nga ata në atdheun e saj që e akuzuan atë se kalonte më shumë kohë duke marrë pjesë në festa sesa në qeverisje. Edhe pse – në atë rast – ishin të shumtë ata që e vlerësuan stilin e saj joformal.

Të tjera