Lajme

Po raportonte në lidhje direkte, gazetares i hidhet lëndë plasëse në veri

Autori: Gazeta inFokus 15:07 | 27 December 2022

Gazetarja e Top Channel Leonita Bajrami u sulmua me lëndë plasëse gjatë kohës që zhvillonte një lidhje direkte për “Shqipëria Live” nga Mitrovica.

Teksa ajo po shpjegonte situatën e krijuar në veri të Kosovës, aty ku janë vendosur dy barrikada të reja mëngjesin e sotëm, i është hedhur kapsolli.

Sapo vuri re prezencën e lëndës plasëse, ajo u largua, por pamjet filluan të transmetoheshin live edhe pas ngjarjes.

-Advertisement-

Ky nuk është sulmi i parë ndaj gazetarëve që po raportojnë nga veriu.

Të hënën në veri të vendit, specifikisht afër barrikadave të vendosura në fshatin Çabër të Zubin Potokut, është sulmuar me gurë një ekip i mediumit Klan Kosova.

Klan Kosova kishte raportuar se nga ky sulm kanë mbetur të lënduar gazetarja dhe shoferi.

Drejtori i këtij mediumi, Adriatik Kelmendi, kishte thënë se gazetarja dhe shoferi kanë pësuar lëndime të lehta, dhe se ky sulm është kryer nga serbë të maskuar.

Ambasada e Shteteve të Bashkuara në Prishtinë reagoi duke dënuar këtë sulm.
“Shtetet e Bashkuara i bashkohen Asociacionit të Gazetarëve të Kosovës – AGK dhe Bashkimit Evropian në Kosovë për të dënuar ashpër sulmet e fundit në një seri sulmesh kundër gazetarëve kosovarë. Mediat duhet të jenë në gjendje të punojnë pa kërcënimet e dhunës dhe frikësimit. Media e lirë dhe e pavarur është themeli i demokracisë”, ka thënë ambasadori Jeffrey Hovenier.

Për sulmin e sotëm ndaj ekipit të Klan Kosovës ka reaguar edhe misioni i OSBE-së në Kosovë.

Aty thuhet se “këto sulme janë të papranueshme dhe duhet të ndërpriten menjëherë”.

“Dënojmë fuqishëm sulmin ndaj ekipit të Klan Kosovës sot në Zubin Potok. Ky është sulmi i katërt ndaj profesionistëve të mediave, që po raportojnë nga veriu i Kosovës, që nga fillimi i dhjetorit. Këto sulme janë të papranueshme dhe duhet të ndërpriten menjëherë”.

“Siguria e gazetarëve në kryerjen e detyrave të tyre profesionale duhet të mbrohet në çdo kohë. U bëjmë thirrje të gjithëve që të përmbahen nga aktet e dhunës”, tha OSBE-ja, misioni në Kosovë.

Subscribe në YouTube: GAZETA INFOKUSI