Lajme

Plani i Rritjes, Orav tregon kur do të bëhen pagesat e para – ka një mesazh për Kosovën se si ta shfrytëzojë

Autori: Gazeta inFokus 16:12 | 03 January 2025

Ambasadori i Bashkimit Evropian në Kosovë, Aivo Orav, ka thënë se BE’ja dëshiron të shohë një zgjidhje të qëndrueshme për situatën në veri të Kosovës, ashtu që të gjitha komunitetet të jetojnë së bashku në siguri dhe qetësi, të ndihen të përfaqësuara siç duhet nga ata që janë në detyrë dhe të marrin kujdesin e duhur nga shërbimet publike.

Në një shkrim autorial të publikuar sot, Orav ka folur edhe për përkrahjen financiare prej 6 miliardë euro që BE-ja do të japë për vendet e Ballkanit Perëndimor përmes Planit të Rritjes. Ai ka treguar edhe kur do të realizohen pagesat e para, derisa i ka dhënë mesazh Kosovës që të shfrytëzojë këtë mundësi, të zbatojë Agjendën e saj të Reformës dhe të afrohet më shumë me BE-në,.

“Plani i Rritjes gjithashtu do të inkurajojë reformat e lidhura me BE-në, pasi pagesat në kuadër të Reformës dhe “Groëth Facility” do të bëhen pas përfundimit të hapave të dakorduar të reformës të përcaktuara në Agjendën e Reformës së Kosovës. Në total, më shumë se 880 milionë euro janë në dispozicion për zbatimin e Agjendës së Reformës. Me këtë në mendje, mesazhi im për Kosovën është të shfrytëzojë plotësisht Planin e Rritjes, të zbatojë Agjendën e saj të Reformës dhe të afrohet më shumë me BE-në. Zgjerimi është një proces i bazuar në merita, dhe ritmi i integrimit është gjithashtu në duart e Kosovës. Ai do të varet nga gatishmëria dhe përvoja e saj në zbatimin e reformave të nevojshme”, ka shkruar Orav.

-Advertisement-

Ai ka sqaruar se procesi i reformave nuk është vetëm për marrjen e fondeve apo anëtarësimin në BE, duke shtuar se do të vazhdojnë mbështetjen në këtë proces.

“Ai ka të bëjë me zbatimin e reformave demokratike dhe ekonomike për një Kosovë më të mirë; ka të bëjë me sigurimin e një jete më të mirë për popullin e Kosovës. Në këtë frymë, BE-ja gjithashtu dëshiron të shohë një zgjidhje të qëndrueshme për situatën në veri të Kosovës, një vend ku të gjitha komunitetet të jetojnë së bashku në siguri dhe qetësi, të ndihen të përfaqësuara siç duhet nga ata që janë në detyrë dhe të marrin kujdesin e duhur nga shërbimet publike”, ka deklaruar Orav.

Subscribe në YouTube: GAZETA INFOKUSI