Kryetari i kuvendit, Glauk Konjufca, ka folur në lidhje me komentet që Qeveria e Kosovës pritet që më së largu deri më 18 korrik t’i dërgojë komentet lidhur me planin për Zbatimin e Marrëveshjes Bazike.

Konjufca tha se Marrëveshja Bazike përbëhet prej parimeve dhe çështjeve konkrete, ku sipas tij, parimet e përbëjnë frymën e marrëveshjes, e për të cilat tha se parimet s’kanë afate.

“Parimet nuk kanë afat, nuk mund të thuash më 1 janar 2025 do të fillojë zbatimi i parimit. Parimet janë themelet e marrëveshjes dhe në nenin 2 të marrëveshjes është barazia sovrane mes Kosovës dhe Serbisë. Nuk mund të thotë Serbia ‘me Kosovën do të fillojë të sillet agresore dhe në një moment të caktuar do të fillojë të bëhet fqinj i mirë’”.

“Fqinj i mirë, Serbia ka zgjedhur të jetë në letër në momentin kur e ka pranuar marrëveshjen. Ajo marrëveshje e ka edhe principin e zgjidhjes paqësore të të gjitha sfidave, por ne e përjetuam Banjskën në shtator të vitit të kaluar, pasi Serbia e pranoi marrëveshjen”, tha Konjufca.

Tutje, Konjufca tha se Marrëveshja Bazike përbehet edhe prej çështjeve konkrete, të cilat sipas tij, kanë afate.

“Pastaj janë çështjet konkrete, ato mund të kenë afate. Shembull, kur do të hapet misioni diplomatik i Kosovës në Serbi e çështje të tjera. Problemi është që Serbia po i shkel parimet e marrëveshjes. Unë mund t’i përmend dy këtu, atë barazinë sovrane mes shteteve, duke mos e pranuar fare Kosovën si shtet, as de-facto. Dhe e dyta, principin që mos ta pengojë anëtarësimin e Kosovës në institucione evropiane”.

“Zëdhënësi i BE-së, Peter Stano, ai e adresoi qartë shkeljen e Serbisë. Tha se Serbia ka bërë shkelje të marrëveshjes për sa i përket pengimit të Kosovës në KiE. Në këtë interpretim të marrëveshjes, Kosova ka të drejtë. S’mund të ketë barazi sovrane mes shteteve, kur Bërnabiq e dërgon si kryeministre e Serbisë letrën për ta zhvlerësuar marrëveshjen”, tha Konjufca, njofton Klankosova.tv.

Kreu i kuvendit tha se fakti që Serbia i shkel të gjitha këto parime, i jep të drejtë Kosovës që të mos e hedh hapin tjetër për të gjitha pjesët e tjera të Marrëveshjes Bazike.

“Fakti që Serbia po i shkel të gjitha këto parime, kjo na jep neve të drejtë që të mos e hedhim hapin tjetër për të gjitha pjesët e kësaj, e është dëgjuar Asociacioni që po thonë. Asociacioni është pika e shtatë e kësaj. Asociacioni mund të ketë afat, por Asociacioni nuk është parim”.

“Nëse ne sulmohemi nga Serbia, e nëse ministri i Mbrojtjes i Serbisë thotë ‘ushtria kur të kthehet në Kosovë’, këtu janë shkelur parimet e marrëveshjes. Ne nuk kemi fqinjësi të mirë, kemi armiqësi, por jo për shkak tonin, por për shkak të pozicionimit të Serbisë”.

“Mendoj që në të gjitha shkëmbimet dhe argumentimet që do t’i ketë qeveria, mendoj që kjo do të jetë korniza e shpjegimit të mënyrës se si ne e kuptojmë marrëveshjen dhe pse insistojmë që së pari të nënshkruhet e pastaj të fillohet të zbatohet”, tha ai.

BKT Kosova hap degën më te re në qytetin e Suharekës

Sponsoruar