Fokus

Pesë raste të dhunës në familje për vetëm 24 orë, të gjitha në Prishtinë

Autori: Gazeta inFokus 09:47 | 02 June 2025

Brenda njëzetekatër orëve, Policia e Kosovës ka raportuar pesë raste të dhunës në familje të ndodhura në rajonin e Prishtinës.

Sipas raportit të policisë së Kosovës, në disa raste është ndërhyrë me arrestime, ndërsa në një rast i dyshuari gjendet ende në arrati, shkruan Gazeta Infokus.

Në një nga rastet e raportuara në Prishtinë, “është arrestuar i dyshuari mashkull kosovar pasi që i njëjti dyshohet se ka sulmuar fizikisht viktimën femër kosovare”, thuhet në raportin e Policisë. Viktima ka pranuar tretman mjekësor, ndërsa i dyshuari është dërguar në mbajtje me vendim të prokurorit.

-Advertisement-

Në Graqanicë, është raportuar një rast i dhunës psikike, ku “i dyshuari mashkull kosovar ka ushtruar dhunë psikike ndaj ankuesit mashkull kosovar”. Sipas policisë, i dyshuari gjendet në arrati dhe rasti është në procedurë hetimore.

Një tjetër rast në Prishtinë përfshin një situatë ku “pas një mosmarrëveshje, i dyshuari e ka fyer dhe ka sulmuar fizikisht viktimën femër kosovare”. Me vendim të prokurorit, pas intervistimit, i dyshuari është dërguar në mbajtje.

Gjithashtu në Prishtinë, është raportuar një përleshje fizike mes dy personave, një femër dhe një mashkull, pas një mosmarrëveshjeje. Policia njofton se “nuk raportohet për të lënduar” dhe rasti do të trajtohet në procedurë të rregullt.

Rasti më kompleks është raportuar po ashtu në Prishtinë, ku “pas një mosmarrëveshje, viktima femër kosovare është kanosur dhe fyer nga i dyshuari mashkull kosovar, dhe më pas i njëjti është goditur nga e dyshuara tjetër kosovare”. Të tre personat kanë pësuar lëndime trupore dhe kanë pranuar trajtim mjekësor. “Me vendim të prokurorit, dy të dyshuarit janë arrestuar dhe pas intervistimit janë dërguar në mbajtje”, thuhet në raport.

Policia ka njoftuar se rastet janë në hetim dhe do të ndiqen sipas procedurave ligjore. Institucionet kanë përsëritur thirrjen për raportim të menjëhershëm të dhunës në familje, për të parandaluar eskalimin e situatave dhe për të mbrojtur viktimat./Gazeta Infokus

Subscribe në YouTube: GAZETA INFOKUSI
BKT Kosova lanson Kredinë për Ekonominë Qarkore – e para dhe e vetmja e këtij lloji në Kosovë
-Advertisement-

Të tjera

Fokusi

fokus