Kandidati i LDK-së për deputet, Xhafer Tahiri, ka shpërndarë në profilin e tij në Facebook një reagim të shtrembëruar, duke keqinterpretuar vendimin e Këshillit të Mediave të Shkruara të Kosovës (KMShK) dhe duke dezinformuar publikun. Në vend të ofrimit të një pasqyre të saktë të vendimit të Këshillit, Tahiri ka zgjedhur të nxjerrë nga konteksti një pjesë të tij, duke e paraqitur si fitore të tij dhe duke akuzuar padrejtësisht Gazetën Infokus për publikimin e një lajmi të pavërtetë.

Faktet janë të qarta: KMShK ka konstatuar se Gazeta Infokus ka raportuar bazuar në burime të besueshme dhe ka prezantuar faktet mbi të cilat është mbështetur shkrimi në fjalë. Ankesës së Xhafer Tahirit nuk i është dhënë e drejta në tërësi. Këshilli ka vërejtur vetëm një problematikë në titull, por jo në përmbajtjen e raportimit, e cila është konsideruar e mbështetur në fakte. Pra, vendimi nuk konteston përmbajtjen e lajmit, por vetëm titullin, duke e cilësuar si paragjykues.

Shkrimi në fjalë trajton një çështje të ndjeshme që ka të bëjë me dyshimet për manipulim votash në Vushtrri. Burimet e Gazetës Infokus kanë raportuar se një komisioner i LDK-së, konkretisht Betim Grabanica, njëherësh sekretar i degës së LDK-së në Vushtrri, dyshohet se ka ndërhyrë në numërimin e votave në favor të kandidatit Xhafer Tahiri. Ky informacion është bazuar në dokumente dhe burime të sigurta dhe është raportuar me përgjegjësi profesionale. Për më tepër, është konfirmuar se Prokuroria e Shtetit ka nisur hetime për këtë çështje.

-Advertisement-

Në vendimin e saj, KMShK ka theksuar se “media ka raportuar bazuar në burime të veta të besueshme” dhe se i ka ofruar Këshillit edhe dokumentin mbi të cilin e ka mbështetur raportimin, duke konfirmuar kështu saktësinë e lajmit të publikuar nga Gazeta Infokus.

Pavarësisht qëndrimit të KMShK-së mbi titullin, Gazeta Infokus mbron të drejtën editoriale për të zgjedhur titujt e saj, si një pjesë thelbësore e politikës editoriale të medias. Megjithatë, në respekt të vendimit të Këshillit, Gazeta Infokus mund të rishikojë titullin e lajmit, por pa cenuar përmbajtjen faktike të raportimit, e cila ka qenë dhe mbetet e bazuar në burime të verifikuara dhe të besueshme.

Në vend të reflektimit mbi vendimin e KMShK-së, Xhafer Tahiri ka zgjedhur të keqpërdorë pjesë të tij për të ndërtuar një narrativë të rreme, duke e paraqitur veten si viktimë të një “dezinformimi”. Në realitet, raportimi i Infokusit ka qenë i saktë dhe i bazuar në prova, siç është konfirmuar nga KMShK.

Në këtë kontekst, çdo përpjekje për të shtrembëruar të vërtetën dhe për të njollosur punën e gazetarëve profesionistë është një përpjekje e dështuar për të manipuluar opinionin publik.
Infokusi mbetet i përkushtuar ndaj raportimit të saktë, të drejtë dhe të balancuar, duke respektuar të gjitha standardet e gazetarisë profesionale./Gazeta Infokus

 

Comodita Home rikthen “Garage Sale” për edicionin e tetë, me zbritje deri në 70%

Sponsoruar

-Advertisement-