Këshilli i Ministrave ka miratuar procedurat dhe kriteret që duhet të plotësohen nga shtetasit e huaj për të përfituar shtetësinë shqiptare përmes natyralizimit, në rastet kur kjo vlerësohet me interes të posaçëm për shtetin.

Sipas vendimit të miratuar, shtetësia mund t’u jepet personave të huaj, aftësitë, cilësitë ose veprimtaria e të cilëve sjell përfitime konkrete për Shqipërinë, duke kontribuar në fusha të ndryshme dhe duke krijuar mundësi të reja për vendin.

Interesi shtetëror duhet të jetë i qartë, i argumentuar dhe i verifikueshëm, si dhe të lidhet me politika të caktuara, të dokumentuara dhe të miratuara. Vlerësimi i këtij interesi do të kryhet nga ministria përgjegjëse për fushën përkatëse.

-Advertisement-

Kërkesa për njohjen e interesit shtetëror mund të paraqitet nga vetë aplikuesi ose nga institucione e organizata që veprojnë në sektorët e kulturës, arsimit, sportit, shkencës dhe ekonomisë, me kusht që të kenë marrë më parë miratimin me shkrim të personit të interesuar.

Pas njohjes zyrtare të interesit shtetëror nga ministri përkatës, aplikimi për fitimin e shtetësisë duhet të dorëzohet pranë Agjencisë Shtetërore të Posaçme të Shtetësisë brenda pesë ditëve kalendarike.

Agjencia do të shqyrtojë dokumentet e paraqitura, të dhënat mbi të kaluarën penale të aplikuesit dhe nëse ai është subjekt i masave ndërkombëtare shtrënguese të njohura nga Shqipëria.

Në procesin e verifikimit të sigurisë kombëtare, rendit publik dhe integritetit të aplikuesit do të përfshihen edhe Shërbimi Informativ i Shtetit dhe Policia e Shtetit. Këto institucione duhet të përfundojnë verifikimet dhe të përcjellin përgjigjen brenda 20 ditëve kalendarike.

Ndërkohë, Agjencia ka një afat prej 30 ditësh kalendarike nga marrja e kërkesës për t’i paraqitur ministrit përgjegjës për punët e brendshme një raport me rekomandimin për dhënien e shtetësisë ose për përfundimin e procedurës pa vijuar më tej.

Vendimi përfundimtar i takon Presidentit të Republikës, i cili, pas përcjelljes së propozimit, mund të dekretojë dhënien e shtetësisë ose ta kthejë dosjen pa veprime të mëtejshme, për mbylljen dhe arkivimin e saj.

Vendimi sqaron gjithashtu se paraqitja e një aplikimi nuk garanton fitimin e shtetësisë shqiptare. Në rastet kur konstatohen të dhëna të rreme, aplikuesi mund të përballet me përgjegjësi penale, ndërsa kjo shkelje përbën shkak për ndërprerjen e procedurës ose heqjen e shtetësisë së përfituar.

Pjesë e vendimit është edhe organizimi i Agjencisë Shtetërore të Posaçme të Shtetësisë, e cila do të funksionojë si person juridik publik buxhetor, në varësi të ministrit përgjegjës për Punët e Brendshme, me seli në Tiranë. Drejtori i përgjithshëm i institucionit do të emërohet dhe shkarkohet me urdhër të Kryeministrit, me propozim të ministrit përkatës.

Comodita Home rikthen “Garage Sale” për edicionin e tetë, me zbritje deri në 70%

Sponsoruar

-Advertisement-