Ka hyrë në javën e tretë greva në arsim, ku nxënësit e shumë shkollave kanë mbetur ende pa filluar procesin mësimor këtë vit. Ndonëse disa shkolla kanë marrë vendim për ndërprerjen e grevës, shumë të tjera janë duke e vazhduar një gjë të tillë.

E arritja e një marrëveshje mes Qeverisë së Kosovës dhe SBASHK-ut duket të jetë larg. Pavarësisht takimeve të shumta, në mes të dy këtyre akterëve kemi parë vetëm akuza e kundër akuza.

Së fundmi kryetari i SBASHK-ut, Rrahman Jasharaj tha dje për Telegrafin se ministrja e Arsimit, Arbërie Nagavci është duke u bërë shantazh e presion mësimdhënësve për ndërprerjen e grevës, dhe se për këtë arsye disa shkolla e kanë bërë atë.

Pas kësaj, SBASHK përmes një reagimi për media theksoi se kryeministri Albin Kurti nuk është për dialog, por për do rrugëtimin e vetë të përbuzjes, nënçmimit, linçimit përmes deklaratave, që pastaj shumëfishohen e pasurohen nga militantë në Facebook.

“Një kryeministër që vërtetë e do vendin e tij kurrë nuk do t’i nënshtrohej tekave të tij, që në vend të debatit e zgjidhjes së kërkesave të grevistëve, të merrte një fjali e të përqeshte atë që shkoi në takim bashkë me anëtarë të tjerë të Këshillit Grevist e që kishin qëllimin më të mirë që të debatohej sinqerisht dhe që të arrihej te marrëveshja e pranueshme”, thuhet në reagimin e SBASHK-ut.

Lidhur me situatën në arsim ka reaguar edhe Avokati i Popullit, i cili u ka bërë thirrje palëve që të reflektojnë dhe të gjejnë zgjidhje për ndërprerjen e grevës.

Avokati i Popullit ka rikujtuar palët se çdo qëndrim apo veprim, në qendër të çdo prioriteti duhet ta ketë interesin më të mirë të fëmijës dhe të drejtën e fëmijëve për edukim dhe arsimim, si e drejtë e garantuar me Kushtetutë.

“Parimi i interesit më të mirë për fëmijët duhet ta udhëheqë secilin prej nesh në kuadër të përmbushjes së detyrimeve dhe të përgjegjësive që kemi. Çdo orë e humbur e mësimit ka pasoja të pandreqshme për fëmijët dhe vazhdimi në mospjesëmarrje në mësim është i dëmshëm në shumë aspekte”, ka deklaruar Avokati i Popullit.

Pas kësaj deklarate nuk ka munguar as reagimi i SBASHK-ut, duke thënë se shkresa e Avokatit të Popullit nuk solli asgjë të re dhe se greva vazhdon.

E ministrja e Arsimit, Arbërie Nagavci sërish ka bërë thirrje që mësimdhënësit të kthehen në shkolla. Ajo ka akuzuar SBASHK-un se po refuzon bashkëpunimin me Qeverinë dhe ndërmjetësit për të gjetur një zgjidhje për grevën në arsim.

“Si Qeveri kemi pritur që të ketë gatishmëri edhe nga SBASHK-u dhe të vazhdojmë dialogun social e të fillojë mësimi. Por, përmes mediave kemi parë tashmë që Sindikata ka dalë me qëndrim se greva vazhdon”, ka shkruar Nagavci.

Ministrja ka theksuar se si e tillë, greva e ka humbur çdo kuptim andaj, si ministre e Arsimit ftoj mësimdhënësit anembanë Kosovës që nga nesër (sot) t’u kthehen shkollave.

Bashkimi i Sindikatave te Pavarura të Kosovës nga data 25 gusht ka nisur grevën në sektorin publik në vend.

Ata po kërkojnë hartim dhe hyrje në fuqi sa më shpejtë të Ligjit të pagave, plotësim-ndryshimin e ligjit mbi skemat pensionale dhe pagës 100 euro deri në miratimin e Ligjit të pagave.

Hapet shkolla e mesme profesionale në Qytetin e Ferizajit

Sponsoruar