Isa Mustafa po e teston mundësinë që as javën e ardhshme të mos e procedojë demarkacionin në Parlament. Ka paralajmëruar se marrëveshjen për shënimin e vijës kufitare e dërgon në Kuvend vetëm kur t’i ketë votat. Zyrtarët e PDK’së kanë thënë se Kryeministri po bën aventura e lojëra me demarkacion për blerë kohë.

Po t’i shkonte fjala Kadri Veselit në Qeverinë e Kosovës, atëherë, marrëveshja për shënimin e vijës kufitare me Malin e Zi, javën e kaluar, do të përfundonte në Parlamentin e Kosovës.

Mirëpo, një paralajmërim të tillë nuk e ka respektuar Shefi i Qeverisë, Isa Mustafa, i cili kishte qëndruar në Bruksel, në përpjekje për të bindur BE’në që të hiqet për një kohë kushti i demarkacionit për liberalizimin e vizave.

Zyra Kryeministrit dhe Zëdhënësi i Qeverisë kishin konfirmuar, megjithatë, javën e ardhshme demarkacioni do të procedohet në Parlament për miratim.

Krejt këto paralajmërime i ka hedhur poshtë, sot, Kryeministri Isa Mustafa, i cili ka thënë se demarkacioni shkon në Kuvend vetëm atëherë kur të sigurohen votat. Madje, në një intervistë televizive kishte deklaruar se marrëveshje me Malin e Zi mund të shtyhet më së largu në qershor të këtij viti.

Anëtari i Kryesisë së PDK’së, Xhavit Haliti, thotë se është e pakuptimtë të harxhohet më shumë kohë për të dërguar demarkacionin në Parlament. Madje, ai thotë se Kryetari i LDK’së po tenton të blejë kohë për të arritur cakun ku dëshiron të shkojë.

“Në qoftëse duam ta kalojmë atëherë duhet të përgatitemi për ta kaluar, përgatitje dmth me i pas votat, e në qoftëse duam të kriojmë situata të paqarta dhe të paparashikueshme atëherë mund të bëjmë avantura thuajse jemi bërë të shurdhër”, ka thënë Haliti, për Express, të shtunën.

“Une besoj që kryeministri nuk është i sigurtë që i ka votat dhe kërkon kohë për të arritur në cakun ku dëshiron”, ka shtuar ai.

Ndryshe, Isa Mustafa, sot ka thënë se po shikojnë mundësinë që marrëveshjen me Malin e Zi ta procedojnë në Parlament vetëm atëherë kur t’i sigurojnë votat.

“Të shohim si janë gjasat e prezencës së tyre në Kuvend dhe votimi. Ne do ta procedojmë në Kuvend në momentin që e kemi të sigurt se do ta kapërcejmë. Për ne është e rëndësishme që të bëhet ratifikimi, që të liberalizohen vizat për qytetarët”, ka deklaruar Kryeministri Mustafa.

Por, Nënkryetari i Kuvendit, Xhavit Haliti thotë se demarkacioni po përdoret më shumë për interesa politike se sa për zgjidhjen e problemit të vizave.

Është paralajmëruar prej Kadri Veselit e Isa Mustafës se nëse dështon demarkacioni në Parlament, atëherë, vendi do të shkojë në zgjedhje të jashtëzakonshme.

Kosova vazhdon të mos ketë liberalizim të vizave pikërisht për shkak të demarkacionit, i cili vazhdon të mbetet i bllokuar prej dy viteve, prej kohës kur kjo marrëveshje ishte nënshkruar prej Hashim Thaçit e Skender Hysenit në Vjenë./GazetaExpress/

EURO 2024 dhe Serie A, dy ekskluzivitetet absolute të Artmotion këtë vit

Sponsoruar