Lajme

Pasi jep dorëheqje Millosh Vuçeviq, pranon se anëtarët e PPS sụlmuan studentët

Autori: Gazeta inFokus 14:40 | 28 January 2025

Millosh Vuçeviq dha dorëheqje nga pozita e kryeministrit të Serbisë. Siç ka shpjeguar, ai jep dorëheqje sepse mendon se është objektivisht përgjegjës për sulmin ndaj studentëve që ndodhi mbrëmë në Novi Sad.

Në fjalimin e tij drejtuar qytetarëve, Vuçeviq ka thënë se arsyeja e dorëheqjes së tij ishte sulmi ndaj studentëve që ndodhi mbrëmë në Novi Sad para zyrave të Partisë Përparimtare Serbe, të Vuçiqit në këtë qytet.

“Mendoj se kjo politikë që i përkas unë, partia që unë drejtoj, e ka fituar së bashku me presidentin e Republikës në çdo zgjedhje qysh prej vitit 2012. Ajo duhet t’u tregojë të gjithëve, në mënyrë të përsëritur, nivelin më të lartë të përgjegjësisë, duhet të sjellë dhe demonstrojë ligje të reja në politikën serbe, duhet të tregojë se është më e përgjegjshmja, se është objektivisht më e përgjegjshmja dhe prandaj, pas kësaj ngjarjeje në Novi Sad, vendimi im i parevokueshëm është të jap dorëheqjen nga pozita e kryeministrit”, ka thënë Vuçeviq.

-Advertisement-

Ai ka shtuar se sot në mëngjes ka pasur një bisedë me presidentin serb Aleksandar Vuçiq, i cili ka pranuar argumentet dhe “vendimin e tij”.

“Për të mos ngritur më tej tensionet në shoqëri, e kam marrë këtë vendim që jua kam komunikuar”, ka thënë Vuçeviq.

Ai ka bërë të ditur se sot do të japë dorëheqje edhe kryetari i Novi Sadit, Millan Gjuriq.

“Me këtë kemi plotësuar edhe kërkesat më politike të pjesës “më ekstreme” të protestuesve. Edhe kryeministri edhe kryetari i Novi Sadit besojnë se janë objektivisht përgjegjës për atë që ka ndodhur dhe si objektivisht përgjegjës po japim dorëheqjen. Kjo le të çojë në qetësimin e pasioneve, le të çojë në kthim në dialog, në bisedë. Për cilën parti të votoni apo përkrahni, ne duhet të jemi të vetëdijshëm se Serbinë duhet ta ruajmë si shtet, e jo Serbinë si emocion”, ka thënë kryeministri serb në dorëheqjen e tij, përcjell Paparaci.

Dorëheqja e Vuçeviqit dhe Gjuriqit, së bashku me publikimin e dokumentacionit të plotë për rindërtimin e stacionit hekurudhor në Novi Sad, ishte kërkesa e parë e opozitës dhe studentëve të Novi Sadit pas shembjes së çatisë më 1 nëntor, kur humbën jetën 15 persona.

Kryeministri në dorëheqje saktësoi se në këtë moment e gjithë qeveria është në mandat teknik, pra në dorëheqje.

“Do të bëj punën time derisa të zgjidhet një kryeministër i ri. Në këtë situatë e gjithë qeveria është në një mandat teknik, me dorëheqjen e kryeministrit bie i gjithë kabineti, praktikisht e gjithë qeveria është në dorëheqje. Ne do të bëjmë punën tonë në mënyrë profesionale dhe me përgjegjësi derisa të zgjidhet një qeveri e re ose derisa të merret ndonjë vendim i ri apo ndonjë vendim politik ndryshe”, ka thënë Vuçeviq në një konferencë për media.

Subscribe në YouTube: GAZETA INFOKUSI
Çka po ndodh me DITËLINDJEN e Viva Fresh Store?!
-Advertisement-

Të tjera

Fokusi

lajme