Lajme

Pas vendimit të Gjykatës Kushtetuese, reagojnë ish-anëtarët e Bordit të RTK-së

Autori: Gazeta inFokus 14:22 | 02 August 2023

Pasi Gjykata Kushtetuese vlerësoi se me shkarkimin e bordit të RTK-së nga Kuvendi është shkelur Kushtetuta në vitin 2021, kanë reaguar ish-anëtarët e Bordit.

Lirim Geci njëri nga anëtarët e shkarkuar ka thënë se vendimi për shkarkimin e tyre ka qenë politik.

“Drejtësia triumfoi përball arrogancës! Deputetët e pushtetit më 8 korrik 2021 ishin ekzaltuar nga shkarkimi i bordit të RTK-së, duke u thirrur në “kushtetutshmëri” dhe “ligjshmëri”. Natyrisht, që nga dita e parë kam besuar se vendimi ka qenë politik, antikushtetues, antiligjor dhe inatçor. Se vendimi ishte i tillë e dëshmoi sot Gjykata Kushtetuese! Lexim të këndshëm për shkelësit e Kushtetutës!”, ka shkruar Geci.

-Advertisement-

Kurse, ish-anëtari tjetër Petrit Musolli ka thënë se vendimi i Kushtetueses i ka vënë laurën arrogancës së pushtetit mbi pavarësinë e RTK-së.

“Për më tepër sesa vendosjen e drejtësisë për ne ish-anëtarët e Bordit të RTK-së, të shkarkuar padrejtësisht, Gjykata Kushtetuese i vuri laurën arrogancës së pushtetit politik mbi pavarësinë e mediumit publik! Për më tepër sesa ofrimit të një satisfaksioni moral për ne ish-anëtarët e Bordit të RTK-së, të shkarkuar padrejtësisht, Gjykata Kushtetuese cimentoi barrierën kufitare mes pushtetit politik dhe pavarësisë së mediumit publik dhe garantoi sigurinë juridike për të gjithë pasardhësit e Bordit të RTK-së! Prandaj, uroj të gjithë anëtarët e sotëm e të nesërm të Bordit të RTK-së për këtë fitore, para së gjithash, për ta!”, ka shkruar Musolli.

Subscribe në YouTube: GAZETA INFOKUSI