Lajme

Pas Serbisë edhe Rusia mohon masakrën e Reçakut

Autori: Gazeta inFokus 23:09 | 12 December 2019

Edhe Kremlini zyrtar ka reaguar pas vendimit të Gjykatës Themelore të Prishtinës për ish-ministrin e MAPL-së, Ivan Todosijeviq.

Më 5 dhjetor të këtij viti, Gjykata Themelore në Prishtinë, kishte dënuar me dy vjet burg ish-ministri i Administratës dhe Pushtetit Lokal (MAPL), Ivan Todosijeviq, pasi është shpallur fajtor për deklaratat që i kishte bërë në lidhje me shqiptarët dhe masakrën e Reçakut.

Tedosijeviq akuzohej për veprën penale “nxitja e urrejtjes, përçarjes ose mos durimit kombëtar, racor, fetar apo etnik”.

-Advertisement-

Ky vendim i Gjykatës Themelore të Prishtinës kishte nxitur reagime në Serbi, ku presidenti serb, Aleksandar Vuçiq, dhe zyrtarë të tjerë serbë e quajtën masakrën e Reçakut një trillim.

Gjatë së enjtes ka reaguar edhe Ministria e Punëve të Jashtme e Rusisë.Zëdhënësja e diplomacisë ruse, Maria Zaharova, ka thënë se Moska zyrtare e dënon verdiktin e Kosovës ndaj Ivan Todosijeviqit.

Sipas Zaharovas aktgjykimi ndaj Todosijeviqit është një dëshmi tjetër e shtypjes anti-serbe të zbatuar në mënyrë sistematike nga autoritetet e Kosovës.

“Ne e dënojmë me forcë aktgjykimin e Prishtinës kundër anëtarëve të Listës Serbe, në këtë rast të Ivan Todosijeviçit, vetëm sepse ai foli për mënyrën e trillimit të ngjarjeve në fshatin Reçak”, tha Zaharova, raporton “Sputnik”.

Ajo në një konferencë për medie tha se, një ekip ekspertësh ndërkombëtarë akoma nuk kanë arritur që të përfundojnë hetimet për masakrën e Reçakut dhe akoma nuk ka një përgjigje unike.

“Kishte shumë mosmarrëveshje që nga fillimi, dhe prova të shumta treguan se ekzistonte një konflikt midis forcave serbe të sigurisë dhe pjesëtarëve të UÇK-së”, u shpreh Zaharova, transmeton më tutje lajmi.net.

Sipas Zaharovës, autoritetet kosovare po vazhdojnë të insistojnë në versionin e tyre të ngjarjeve, por edhe të merren me kundërshtarët politikë, në veçanti serbët lokalë.

Theksojmë se për gjuhën që ka përdorur Vuçiq për masakrën e Reçakut dhe mospranimin e saj, kanë reaguar edhe udhëheqësit shtetëror të Kosovës dhe ambasadat e vendeve të ndryshme në Kosovë, të cilët e kanë dënuar gjuhën e Vuçiqit dhe i kanë rikujtuar atij, që masakra e Reçakut është një dëshmi se çfarë ka ndodhur në Kosovë gjatë luftës dhe çfarë ka bërë ushtria serbe me popullatën civile.

Subscribe në YouTube: GAZETA INFOKUSI
Shkolla Finlandeze lanson programin IMPACT: Tani edhe në gjuhën shqipe, me çmim të përballueshëm

Të tjera