Fokus

Pas raportimit të Infokusit, komisioni për buxhet diskuton për “hallakamat” në BQK e dorëheqjen e Zv. Guvernatores

Autori: Hateme Smajli 11:15 | 24 May 2023

Gazeta Infokus javën që lamë pas raportoi ekskluzivisht se Zëvendës guvernatorja e Bankës Qendrore të Kosovës, Nora Latifi – Jashari ka dhënë dorëheqje pas afro një muaji që mori këtë detyrë.

E këtë çështje e ka ngritur në mbledhjen e Komisionit Parlamentar për Buxhet dhe Financa deputeti i Lidhjes Demokratike të Kosovës, Avdullah Hoti.

Hoti ka shprehur shqetësimi se pas dorëheqjes së guvernatores ky institucion financiar i Kosovës ka mbetur pas asnjë person që e menaxhon atë e megjithatë po neglizhohet në komisione sikur të ishte temë e parëndësishme.

-Advertisement-

“Kjo është çështje shumë e rëndësishme dhe duhet të jetë pjesë e rendit të ditës, unë iu kam dërguar edhe email pasi na keni dërguar rendin e ditës dhe kam kërkuar që të futet edhe kjo pikë por nuk kam marrë përgjigje nga administrata. Kam lexuar në media se ka dhënë dorëheqje edhe Zv. Guvernatorja e BQK-së e nuk ka bord fare, pra nuk është një person i vetëm që menaxhon me sistemin financiar në Kosovë dhe ne si komision po e lëmë këtë punë nuk po them që po e neglizhojmë por të lëmë si temë të rëndomtë që kur të na vijë rendi ta diskutojmë.

LEXO EDHE: A provoi ta fshihte BQK-ja, dorëheqjen e zv. guvernatores, Nora Latifi – Jasharit?

“Unë kam dërguar edhe email besoj e keni parë për nevojën që kemi për tu informuar se ku ka mbetur procesi i zgjedhjes së guvernatorit. Është marrë një vendim në këtë komision në kundërshtim me ligjin e që vendimi i ka shkuar kryesisë por që nuk kemi më asnjë informatë se çfarë ka ndodhë me atë proces në BQK.”

E për këtë ka reaguar edhe nënkryetari i Komisionit, Mergim Lushtaku i cili ka thënë se në lidhje me këtë çështja ai prej javës së kaluar ka bërë kërkesë që kjo temë të hyjë në rend të ditës dhe ka shtuar se kjo temë e rëndësishme duhet të shtohet sot në rend të ditës.

Pas këtyre reagimeve u morr vendim që çështja e Bankës Qendrore, zgjedhjes së guvernatorit dhe dorëheqjes së Zv. Guvernatores të diskutohet me urgjencë në mbledhjen e radhës.

Kujtojmë se Gazeta Infokus raportoi nga burime të saj se Zv. Guvernatorja dha dorëheqje vetëm afro një muaj pasi kishte marrë postin.

Më pas kjo u konfirmua edhe nga BQK-ja të cilët përmes një komunikate për media treguan se Nora Latifi – Jashari kishte dhënë dorëheqje për arsye personale të obligimeve që ka, duke siguruar se kjo nuk e cenon arritjen  objektivave të BQK-së si institucion.

Derisa Infokus kishte ngritur pikërisht shqetësimin se institucioni financiar që rregullon çdo institucion tjetër në Kosovës, ka mbetur qysh nga viti i kaluar pa guvernator, ndërsa momentalisht është duke operuar pa bord dhe me vetëm një ushtrues detyre të guvernatorit. /Gazeta Infokus/

LEXO EDHE: Dorëheqja e zv. Guvernatores pas një muaji “alarmante për shtetin”, çfarë po ndodhë me BQK-në?

 

 

Subscribe në YouTube: GAZETA INFOKUSI

Të tjera

Fokusi

fokus