Lajme

Paradoksale: Grabitësi i rrezikshëm endet i lirë, policët që e arrestuan u dënuan me burgim e u suspenduan nga puna

Autori: Gazeta inFokus 17:08 | 19 November 2021

Arrestimi i dy recidivistëve të rrezikshëm, me dhjetëra raste penale, për grabitjen e armatosur të së hënës në Prizren, ku si pasojë u plagosen babë e bir, pronar të argjendarisë ku u provua të kryhet vjedhja, ka kthyer edhe një herë vëmendjen se si në Kosovë shkaku “i çalimeve” në sistemin e sigurisë dhe drejtësisë, herë pas herë, lihen të lirë persona të rrezikshëm, e me të kaluar të përsëritur kriminale.

Gazeta Online Reporteri.net ua sjellë historinë e Muhamer Raifit, i dyshuar për një grabitje të armatosur në Gjakovë, dhe që në polici ka të regjistrua hiç më pak se rreth 60 raste tjera të ngjashme, por që endet i lirë. Madje, sikur të mos mjaftonte, Raifit ia panë sherrin edhe një grup policësh, përfshirë ish-komandantin e stacionit policor, që ‘guxuan’ ta arrestonin atë në vitin 2018 në Gjakovë, pas një shkëmbimi me armë zjarri që patën, pasi policia ishte vënë në ndjekje të tij derisa u zu në flagrancë duke kryer grabitjen në një shitore cigaresh.

Muhamer Raifi, nga Prishtina, bashkë me katër grabitës të tjerë dyshohet se me 14 nëntor 2018 tentuan ta grabisin një ‘tobacco shop’ në Gjakovë. Përpjekja e tyre për të grabitur lokalin ishte ndërprerë në gjysmë nga një patrullë e policisë e cila kishte arritur në vendin e ngjarjes.

Grabitësit ishin larguar nga aty me shpejtësi, me veturën e tyre, por kur policia iu ishte vënë atyre pas, vetura e katër të dyshuarve ishte aksidentuar në rrugë tek parku i qytetit.

Tre prej tyre kishin arritur të largoheshin, e vetëm Muhamer Raifi ishte kapur nga patrulla policore.

Por dosja penale e Raifit në polici nuk del ta ketë të regjistruar vetëm këtë rast. Ai dyshohet dhe u arrestua për ta paktën rreth 60 raste tjera penale, shumica prej tyre si i dyshuar për grabitje e vjedhje.

Megjithatë, Raifi sot është i lirë dhe askush nuk është në ndjekje të tij.

Paradoksi i të gjithë historisë së tij është se në vend se të dënohet grabitësi, që kur u kap nga Policia e Gjakovës doli të jetë i armatosur dhe shkëmbeu plumba me policët, përkundrazi Muhamer Raifi arriti të çojë në dënimin dhe suspendim të përkohshëm nga puna të atyre që e prangosën.

Katër policë të stacionit policor të Gjakovës, bashkë me ish-komandantin e policisë në këtë komunë, Kristë Gjokaj, në korrik të këtij viti u dënuan me burgim e që me pajtimin e tyre u zëvendësua me gjoba me para, për rastin e arrestimit të grabitësit të armatosur.

Kjo pasi sipas Prokurorisë, e që u vërtetua në Gjykatë, se pesë policët gjakovarë, përshirë ish-komandantin e tyre në Gjakovë, kryen “keqtrajtim gjatë ushtrimit të detyrës zyrtare ose autorizime publike”, ndaj Muahmer Raifit në natën e 15 nëntorit 2018 kur e arrestuan në flagrancë dhe pas një shkëmbimi zjarresh me armë me të.

Madje, për ish-komandantin pati edhe pasoja tjera në punë. Pasi humbi pozitën e komandantit të stacionit dhe për një kohë të gjatë qëndroi edhe i suspenduar nga puna si polic.

Gjithçka kishte nisur në tetor të vitit 2019, kur pamjet e keqtrajtimit të Muahmer Raifit në stacionin policor në Gjakovë, pasi ishte kapur nga policia në një shkëmbim zjarri me ta, pas grabitjes së armatosur, ishin publikuar në një media në Kosovë.

Raportimi në fjalë fshehte shumë fakte. Aty Raifi paraqitej si një qytetar i thjeshtë që gjoja ishte arrestuar nga Policia “teksa po priste një shoqe në parkun e qytetit të Gjakovës”, e pastaj ishte keqtrajtuar në stacionin policor të qytetit.

Bashkë me ish-komandantin Gjokaj, për kapjen në flagrancë në Gjakovë të grabitësit të armatosur nga Prishtina, pasoja ligjore e në punë patën edhe katër policët tjerë të këtij stacioni: kapiteni B. P., rreshteri G.B. si dhe policët A.I., M.U. dhe Sh.L..

E prishtinasi i rrezikshëm, i njohur si i dyshuar për vjedhje e grabitje, në rreth 60 rastet penale të regjistrua në Polici, vendet ku u regjistruan precedentët e tij penal i ka pothuajse në gjithë rajonin e Dukagjinit.

Gazeta Online Reporteri.net ka provuar të marrë informacione në lidhje me Raifin në Policinë e Kosovës, por ata kanë refuzuar të japin duke u bazuar sipas tyre në “ligjin për mbrojtjen e të dhënave personale”.

“Bazuar në ligjin mbi mbrojtjen e te dhënave personale, nuk mund të jepen informacione dhe e kaluara për persona fizik, përveç nëse organet e drejtësisë vlerësojnë/kërkojnë”, thuhet në përgjigjen e Policisë.

Gazeta Online Reporteri.net para disa javësh kishte kërkuar informacione rreth Raifit edhe në Gjykatë e Prokurori të Shtetit, por nuk ka marrë asnjë herë përgjigje në pyetjet dhe kërkesat e gazetës për informacione rreth tij.

Megjithatë, sikur Muhamer Raifi, deri dje në liri kanë qëndruar edhe dy grabitës tjerë të rrezikshëm, të njohur për të bëmat e tyre, prej vitesh në gjithë Kosovës.

Leotrim Latfi dhe Ibrahim Qadraku dje u arrestuan bashkë me një person të tretë si të dyshuar për grabitjen e armatosur të së hënës në një argjendari në Prizren, ku për pasojë pati dy të plagosur, babë e bir pronar të biznesit.

Latifi e Qadraku ishin emra të njohur edhe për policinë. Ata në të kaluarën ishin kapur nga kamerat e sigurisë duke vjedhur disa nga filialet e bankave më të mëdha në vend. Megjithatë, endeshin të lirë.

Madje Latifi ishte liruar këtë vit nga paraburgimi me vendim të Gjykatës, ndonëse për kapjen e tij, policia para tre vitesh jepte shpërblim me para.

Të tjera