Lajme

Osmani zbulon se po shqyrtohet heqja e vizave mes Kosovës dhe këtij shteti

Autori: Gazeta inFokus 14:20 | 02 July 2022

Presidentja Vjosa Osmani javën që shkoi ka vizituar shtetin e Tajlandës dhe u takua me liderët shtetërorë atje. Në një intervistë dhënë mediumit “Bangkok Post”, shefja e shtetit ka deklaruar se janë duke u diskutuar hapat e ardhshëm që Tajlanda t’i heqë vizat për kosovarët.

“Ne po diskutojmë që ta heqim regjimin e vizave që kosovarët ta vizitojnë Tajlandën pa pasur nevojë të pajisen me vizë dhe tajlandezët mund ta vizitojnë Kosovën dhe rajonin tonë në evropën juglindore pa viza. Kjo do të ishte një marrëveshje dypalëshe që do të mundësonte më shumë bashkëpunim dhe vizita nga tajlandezët, të cilët do të fitonin më shumë njohuri për Kosovën dhe anasjelltas”, ka deklaruar Osmani.

Ajo ka thënë se Kosova do të ishte destinacion ideal për bizneset tajlandeze që të investojnë.

“Potenciali jonë njerëzor është numër një sepse jo vetëm që jemi të rinjë por jemi të aftë për teknologjinë, shumëgjuhësh, të kualifikuar dhe të edukuar”, është shprehur Osmani.

Presidentja Osmani ka thënë se vizita e saj në Tajlandë tregon se Kosova kujdeset për marrëdhëniet me shtetin aziatik.

“Pra, unë jam këtu si kryetare shteti duke vizituar Tajlandën për të treguar se ne me të vërtetë kujdesemi për këtë marrëdhënie dhe gjithashtu them se shoh shumë potencial për të ndërtuar më tej gjërat, veçanërisht kur bëhet fjalë për fushën e tregtisë, turizmit dhe kështu me radhë”, shtoi ajo, transmeton Express.

Osmani ishte në Bangkok më 23–25 qershor për të marrë pjesë në Samitin Global të Grave (GSË) 2022, mes 650 delegatëve nga 52 vende të pranishëm.

Të tjera

Fokusi

lajme