Presidentja Vjosa Osmani e quajti Serbinë kancer të Evropës, ndërsa tha se ajo bashkë me Rusinë po e rrezikojnë jo vetëm stabilitetin regjional, por edhe stabilitetin në Kosovë, Maqedoninë e Veriut, Mal të Zi e në shumë shtete tjera.

Lidhur me Asociacionin e komunave me shumicë serbe, Osmani tha “nuk është interes i yni që të krijojmë diçka kundërkushtetutës apo ndonjë prelud tjetër të shtetit serb” Ajo tha po ashtu se një asociacion i tillë mund të ketë maksimumi kompetenca të një OJQ-je. Për këto deklarata reagoi sot drejtori i të ashtuaquajtur zyrë për Kosovën në qeverinë e Serbisë, Petar Petkvoiq, raporton Gazeta Express.

“Kur një shtet si Serbia me Rusinë rrezikojnë jo vetëm stabilitetin regjional por edhe stabilitetin Kosovë, Maqedoninë e Veriut, Malin e Zi e shumë shtete të tjera, është e natyrshme që BE-ja të reagojë për shkak se ke armatim rusë në kufi me Kosovën dhe Serbinë dhe për të gjitha këto BE-ja nuk reagoi asnjëherë”, tha Osmani mbrëmë.

Osmani tha se “Serbia nuk ka asnjë interesim që të nënshkruaj marrëveshje finale më Kosovën”, ndërsa theksoi se Kosova nuk ka marrë ndonjë kërkesë të veçantë nga SHBA-ja lidhur me themelimin e Asociacionit.

“Sa i përket BE-së ishin gjithmonë më insistues që ta zbatonim ‘Asociacionin e Komunave’, ndërsa sa i përket kohës gjatë të cilës unë jam duke qeverisur, SHBA-të nuk kanë paraqitur ndonjë kërkesë të veçantë. Kemi raporte të ndërsjella me SHBA-të ku vetëm faktet ngadhënjejnë dhe ne në të ardhmen do ta sqarojmë se një asociacion me kompetenca të tilla është monoetnik që është në kundërshtim edhe me interesin amerikan në Evropë”, tha Osmani në Kanal10.

Që në mëngjes, drejtori i të ashtuquajturës zyrë për Kosovën në qeverinë e Serbisë, Petar Petkoviq ka reaguar ndaj deklaratave të presidentes së Kosovës, Vjosa Osmani. Përmes një komunikatë për media, Petkoviq tha se qëllimi i qartë i presidentes së Kosovës ishte që “të përpiqet të provokojë një krizë të re me retorikë nxitëse”.

“Formimi i Asociacionit të Komunave Serbe me pushtet ekzekutiv nuk është vetëm obligim i Prishtinës sipas Marrëveshjes së Brukselit, por edhe i Prishtinës, prandaj është e qartë se duke mos respektuar marrëveshjet e Brukselit dhe institucionet e veta, Vjosa Osmani në fakt e vë urrejtjen ndaj Serbisë para çdo motivi tjetër dhe se nuk është e interesuar të kërkojë të zhdukurit, duke normalizuar marrëdhëniet dhe ndërtuar besimin e ndërsjellë përmes dialogut”, tha Petkoviq.

Sipas tij, formimi i Asociacionit do të jetë tema kryesore në takimin e radhës në Bruksel.

“Dhe fakti që Vjosa Osmani dëshiron ta reduktojë jetën e serbëve në Kosovë në nivelin e një organizate joqeveritare, flet qartë për synimin e Prishtinës për t’i futur serbët në Kosovë në një geto politike dhe ekonomike, në të cilën nuk do të kishte liri lëvizjeje apo mendim të lirë, por diçka e tillë nuk do të funksionojë për ta”, është shprehur Petkoviq.

Black Friday në Comodita Home: Përfito 100€ extra zbritje në dyshekë

Sponsoruar