Lajme

Osmani për takimin me Vuçiqin: Ankohej, e nuk tregonte të vërtetën – që është virtyt i tij, duke qenë ministër i propagandës së Millosheviqit

Autori: Gazeta inFokus 14:05 | 02 June 2023

Presidentja e vendit, Vjosa Osmani gjatë në një konference për media pas samitit të liderëve të Komunitetit Politik Evropian ka thënë se në takimin me liderët evropianë kanë pasur mundësi që t’i njoftojë në detaje me atë se çfarë po ndodh në veri dhe se Kosova në baza ditore është e kërcënuar nga Serbia.

E para e shtetit bëri të ditur se nuk ka pasur asnjë plan që të takohet me presidentin e Serbisë, Aleksandar Vuçiq, por ka dashur të përçojë mesazhin si presidente se populli i Kosovës është konstruktiv.

“S’e kam pasur asnjë plan që të takohesha me Vuçiqin…. Si presidente e të gjithë qytetarëve të Kosovës dua të tregoj konstruktivitet, e që është virtyt i popullit tonë dhe që të tregojmë vullnet se mund të flasim me të gjithë… Ia kemi zgjatur dorën e bashkëpunimit Serbisë për vite të tëra dhe nuk është hera e parë që e gjejmë veten me Vuçiqin në takime të tilla”, u shpreh ajo.

-Advertisement-

Osmani bëri të ditur se takimi është mbajtur me insistimin e presidentit francez, Emmanuel Macron dhe kancelarit gjerman, Olaf Scholz.

Ajo potencoi se takimi nuk ishte negociues, por kishte vetëm shkëmbim pikëpamjesh, e në të cilin takim tha se Vuçiqi vajtonte, ankohej e  siç tha ajo “sigurisht nuk tregonte të vërtetën, që është virtyt i tij, duke qenë ministër i propagandës së Millosheviqit”.

Presidentja e vendit tha se gjatë atij takimi ka kërkuar të dijë nëse Serbia do ta implementojë Marrëveshjen, pastaj ka kërkuar të heqë ushtrinë nga kufiri, dhe të mos përkrah bandat kriminale që po shkaktojnë dhunë në veri të vendit.

Sipas saj, në takim ka potencuar përkushtimin e Kosovës për të implementuar çdo pikë të marrëveshjeve. 

Subscribe në YouTube: GAZETA INFOKUSI

Të tjera

Fokusi

lajme