Presidentja e Kosovës, Vjosa Osmani, ka thënë se institucionet e Kosovës po bëjnë punë të palodshme për ta riparuar, siç tha ajo, dëmin e krijuar më parë ‘kur politika e jashtme flinte’.

Gjatë fjalës së saj në konferencën e përbashkët me homologun kroat, Zoran Milanoviq, Osmani siguroj se Kosova do të ecë përpara dhe se i ka borxh gjeneratave të reja.

Veç kësaj, presidentja e vendit foli edhe për njohjet nga shtetet jo-njohëse, duke thënë se nuk është në interes të Kosovës të bëhen publike takimet pa marrjen e vendimeve.

-Advertisement-

“Si presidente jam e njoftuar për të gjitha detajet që kanë të bëjnë me procesin e njohjeve potenciale, jam e njoftuar nga Ministria e Punëve të Jashtme e cila është Ministria që ka tërë procesin në dorë, të gjitha kontaktet e drejtpërdrejta me këto shtete jo-njohëse, duhet ta dini që është në interesin e Republikës së Kosovës, që derisa të ndodh njohja mos të bëhen publike takimet tona me shtete jo-njohëse. Deri në marrjen e vendimit, kushdo që për interesa personale tenton të bëjë publike përpjekjet tona drejt njohjeve, vetëm dëmton interesin e vendit, unë besoj se askush në Kosovë, pavarësisht funksionit që ka, s’ka një qëllim të tillë”.

“Kosova meriton që të njihet nga e gjitha bota demokratike, nga të gjitha shtetet anëtare të Kombeve të Bashkuara, sepse s’ka asnjë arsye, historike, politike apo ligjore që do t’i jepte dikujt arsye që mos ta njohë Kosovën. Siguroj të gjithë qytetarët që përkundër dezinformatave që tentohen të shpërndahen, institucionet e Kosovës po bëjnë punë të palodhsme të riparojnë dëmin e krijuar më parë, kur politika e jashtme flinte dhe ishte totalisht e çakorduar, dëm ky marramendës i cili merr kohë për ta riparuar. E në anën tjetër që kur të kthehet treni në binar, të ecim përpara, t’i bindim shtetet që ta njohin Republikën e Kosovës”.

“Shumë sakrifica janë bërë nga populli ynë që të ndërtohet ky shtet i lirë, por më shumë ua kemi borxh edhe gjeneratave të reja të ecin përpara, të shohin perspektivë dhe t’ua lajmë borxhin të gjithëve që dhanë gjithçka që ne të qëndrojmë në këmbë sot. Kosova e meriton të njihet, dëmit të madh që i bërë në të kaluarën, ju siguroj që ne do të ecim përpara”, tha Osmani.

Comodita Home rikthen “Garage Sale” për edicionin e tetë, me zbritje deri në 70%

Sponsoruar

-Advertisement-