Lajme

Osmani: Nëse zvarritet shumë, s’e kam problem ta dërgoj çështjen në Kushtetuese

Autori: Gazeta inFokus 15:55 | 15 Maj 2025

Presidentja e Kosovës, Vjosa Osmani, ka deklaruar se është e gatshme të shqyrtojë mundësinë për t’iu drejtuar Gjykatës Kushtetuese lidhur me bllokadën në Kuvend, në rast se kriza politike zvarritet edhe më tej.

Pas takimit me liderët e partive politike, Osmani tha se ka diskutuar këtë çështje me ta dhe theksoi se nuk ka pasur asnjë kundërshtim për një veprim të tillë nga ana e saj, shkruan Gazeta Infokus.

“Nëse kjo situatë vazhdon të zvarritet, ekzistojnë disa opsione që mund të shfrytëzohen nga vetë deputetët. Deri më tani, AAK ka kontestuar një vendim që lidhet me formën e votimit, jo domosdoshmërisht me procesin në tërësi. Një tjetër mundësi është që unë, si presidente, të shfrytëzoj kompetencat kushtetuese dhe t’i drejtohem Gjykatës Kushtetuese. Sot ua kam bërë të qartë liderëve se, nëse ka pajtim nga ana e tyre, unë nuk e kam aspak problem ta ndërmarr këtë hap. Nuk ka pasur ndonjë kundërshtim nga askush”, u shpreh Osmani.

-Advertisement-

Ajo shtoi se do të pritet edhe disa ditë për të parë nëse do të ketë një marrëveshje politike për konstituimin e Kuvendit, përpara se të merret një vendim përfundimtar.

“Dialogu konstruktiv është thelbësor – për vendin, për institucionet dhe për besimin e qytetarëve. Ai ndikon gjithashtu në imazhin ndërkombëtar të Kosovës. Ndonëse sot kishte vetëm një disponim minimal, besoj që ai do të rritet me kalimin e kohës. Shpresoj që kjo kohë të mos zgjasë shumë,” përfundoi ajo.