Lajme

Organizatat e luftës paralajmërojnë masa ndaj deputetëve: Mjaft me ngërçe politike, luftuam për një Kosovë funksionale

Autori: Gazeta inFokus 11:16 | 01 July 2025

Organizatat e dala nga lufta – OVL, SHIL dhe SHFD të UÇK-së – bashkë me Shoqatën e të Burgosurve Politikë dhe Shoqërinë “Lëvizja”, kanë reaguar përmes një deklarate të përbashkët, duke ngritur shqetësimin për krizën institucionale që, sipas tyre, po thellohet si pasojë e një ngërçi të panevojshëm politik.

Në njoftimin e publikuar në Facebook, organizatat potencojnë se është e papranueshme që në një kohë të krizës ekonomike, sociale dhe të sigurisë, partitë politike, e në veçanti partia fituese – të qëndrojnë të ngurta ndaj detyrimeve kushtetuese për konstituimin e Kuvendit dhe formimin e institucioneve.

“Ne nuk paragjykojmë askënd, por kur interesi shtetëror vihet në rrezik për shkak të mungesës së kompromisit dhe kryeneçësisë politike, atëherë ndjejmë për detyrë të ngremë zërin publikisht,” thuhet në reagim.

-Advertisement-

Organizatat u bëjnë thirrje të gjitha subjekteve politike që të tregojnë pjekuri politike dhe të gjejnë një zgjidhje të qëndrueshme që respekton Kushtetutën dhe vullnetin e qytetarëve.

“UÇK-ja nuk luftoi për ngërçe politike, por për një Kosovë të lirë dhe funksionale. Nëse situata vazhdon, ne do të ndërmarrim hapa të mëtejshëm për të mbrojtur vlerat për të cilat u sakrifikua shumë,” thuhet në reagimin e tyre përcjell Insajderi.

Theksojmë se deputetët do të mblidhen sot në një përpjekje të re, të 39-ën me radhë për ta konstituuar Kuvendin.

Partitë parlamentare nuk po arrijnë të pajtohen për ta konstituuar Kuvendin as pas aktgjykimit të Kushtetueses që obligon që kjo të bëhet brenda 30 ditësh.

Subscribe në YouTube: GAZETA INFOKUSI