Lajme

Opozita bojkoton votimet në Kuvend për shkak të komisionit hetimor për energji

Autori: Gazeta inFokus 12:19 | 20 April 2022

Opozita do të bojkotojë votimin e projektligjeve në komisionet parlamentare për shkak të mosmiratimit të komisionit hetimor për energji.

Këtë e ka konfirmuar deputetja e kësaj partie, Blerta Deliu-Kodra, në Komisionin për Integrime Evropiane ku sot ishte e paraparë të raportonte ministrja e Drejtësisë Albulena Haxhiu.

“PDK-ja nuk do të marrë pjesë në asnjë votim të projektligjeve përderisa nuk miratohet komisioni hetimor prej përfaqësuesve të mazhorancës. Ne kemi pasë dy tentativa, dje ka dështuar që të miratohet një komision i tillë i cili natyrisht që do të vendosë dritë mbi shumë parregullsitë që kanë ndodhur në procesin e shitjes së energjisë elektrike dhe punësimeve të shumta që kanë ndodhur në KEK”.

-Advertisement-

Deliu-Kodra e cilësoi qasjen e mazhorancës karshi këtij komisioni hetimor si arrogante, derisa tha se opozita ka qenë konstruktive me pjesëmarrjen dhe votimin e projektligjeve në komisionet parlamentare, njofton Klankosova.tv.

“Opozita si asnjëherë më parë ka marrë pjesë në miratim të projektligjeve të marrëveshjeve ndërkombëtare, por me këtë qasje arrogante nuk do të bëhemi pjesë e miratimit të asnjë projektligji pa i hapur rrugë komisionit hetimor i cili është shumë i rëndësishëm në momentin që ndodhet vendi. Mazhoranca duhet të jetë e vetëdijshme që duhet ta përkrahë dhe t’i hapë rrugë këtij procesi, sepse është e drejtë kushtetuese. Nuk do të jemi pjesë e votimit pa u hapur mundësia e konstituimit të komisionit hetimor, shpresoj që në takimin e radhës të Kryesisë së Kuvendit edhe mazhoranca do të reflektojë dhe ne do t’i kthehemi punës tonë në komisione”.

Edhe AAK-ja ka qëndrim të njëjtë, prandaj deputetja e kësaj partie, Time Kadrijaj, ka thënë se me bojkotin e opozitës në votim nuk ka kushte që të vazhdojë mbledhja e Komisionit për Integrime Evropiane.

Deputeti i Vetëvendosjes, Agon Batusha, ka thënë se opozita zgjedh metodën për ta dhënë mendimin e tyre, qoftë edhe me bojkot, megjithëse s’e konsideron një gjë të drejtë afektimin e punës së komisioneve.

Kryetarja e këtij komisioni, deputetja e LDK-së Rrezarta Krasniqi, e ka mbyllur mbledhjen duke thënë se s’ka vendimmarrje për ta vazhduar atë.

Subscribe në YouTube: GAZETA INFOKUSI