Pas refuzimit të ankesës nga Paneli Zgjedhor për Ankesa dhe Parashtresa si dhe Gjykata Supreme, Aleanca për Ardhmërinë e Kosovës sot është ankuar në Gjykatën Kushtetuese lidhur me rezultatin e zgjedhjeve lokale për kryetar të Istogut.

Avokati Arianit Koci ka thënë për Indeksonline se sot ka dorëzuar në Kushtetuese ankesën në emër të kandiadatit të AAK-së për kryetar të Istogut, Gani Dreshaj.

“Sot, në emër të Gani Dreshajt, kam dorëzuar në Gjykatën Kushtetuese kërkesën për vlerësimin ligjshmërisë së Aktgjykimit të Gjykatës Supreme të dt. 26 dhjetor 2017 me të cilin refuzohet si e pabazuar ankesa e Aleancës për Ardhmërinë e Kosovës (AAK), e paraqitur kundër Vendimit të Panelit Zgjedhor për Ankesa dhe Parashtresa (PZAP) të dt. 23 dhjetor 2017. Gani Dreshaj parashtron se atij i është shkelur e Drejta për t’u Zgjedhur, e garantuar me nenin 45 par. 1 të Kushtetutës së Kosovës, për shkak të shkeljeve gjatë procesit të votimit dhe shkeljeve gjatë administrimit të numërimit të votave”, ka thënë Koci.

-Advertisement-

Sipas tij, shkeljet e lartpërmendura kryesisht kanë të bëjnë me votat e të paktën pesëdhjetë e dy (52) qytetarëve të cilat nuk janë numëruar pasi që këta qytetarë kishin arritur moshën madhore pas përditësimit të listës Përfundimtare të Votimit nga ana e Komisionit Qendror të Zgjedhjeve (KQZ) me dt. 22 shtator 2017.

“Kushtetuta garanton të Drejtën (aktive) për të Zgjedhur dhe të Drejtën (pasive) për t’u Zgjedhur, për të gjithë qytetarët që arrijnë moshën tetëmbëdhjetë (18) vjec, qoftë edhe në ditën e zgjedhjeve. Me mosnumërimin e votave të numrit të lartpërmendur të qytetarëve zotit Gani Dreshaj i është shkelur e Drejta për t’u Zgjedhur.

Pra, keqmenaxhimi në listat e votimit e ka cenuar jo vetëm të drejtën të qytetarëve të komunës së Istogut për të zgjedhur por, e ka cenuar edhe të drejtën e Gani Dreshaj për t’u zgjedhur”, ka theksuar Koci.
Ai thotë se Gani Dreshaj beson që rezultati përfundimtar i zgjedhjeve në komunën e Istogut nuk e reflekton vullnetin e qytetarëve, andaj beson se Gjykata Kushtetuese do të luajë rolin e saj për të mbrojtur të drejtat dhe liritë e garantuara me Kushtetutë për çdo qytetar të saj, pa dallim.Kujtojmë se kundërkandidat i Dreshajt për kryetar të Istogut ishte Haki Rugova i LDK-së.

Comodita Home rikthen “Garage Sale” për edicionin e tetë, me zbritje deri në 70%

Sponsoruar

-Advertisement-