Rinumërimi i 177 kutive të votimit, me 1613 fletëvotime nga votimi me postë që ishin shpallur të pavlefshme, u bë me vendim të Panelit Zgjedhor për Ankesa dhe Parashtresa pas ankesës së Vetëvendosjes.

Të martën në mesnatë ndërkaq përfundoi rinumërimi i fletëvotimeve nga 50 vendvotime të rregullta, sipas vendimit të KQZ-së.

E kjo situatë rinumërimesh ka ngjallur diskutimet për vonesa në certifikimin e rezultateve.

Ish-kryetari i KQZ-së, Mazllum Baraliu thotë se çdo vonesë drejt shpalljes dhe certifikimit të rezultateve, vonon edhe formimin e institucioneve të reja.

”Janë kaluar afatet e arsyeshme , ndikojnë në deponimin e qytetarëve, validitetin dhe integritetin e procesit zgjedhore si dhe në vonesën e themelimit të Kuvendit dhe institucioneve të tjera”, tha Baraliu.

KQZ-ja kishte paraparë që shpallja e rezultateve të bëhej më së largu 5 mars gjë që nuk ndodhi, derisa certifikimi më 18 mars.

Por sipas, hulumtuesit nga Instituti i Kosovës për Drejtësi, Melos Kolshi me dinamikën që po zhvillohet, vështirë se me këtë datë do të kemi certifikim. Ai tha se reforma zgjedhore e cila ka paraparë eliminimin e vonesave dhe problemet e tjera gjatë numërimit nuk është zbatuar.

“Pritshmërit kanë qenë që rezultatet t’i kemi më shpejtë. Secila vonesë në shpalljen e rezultateve dhe certifikimin e tyre na ndikon në vonesën e formimit të institucioneve”, tha Kolshi.

Ditë më parë Komisioni Qendror i zgjedhjeve tha se me shpalljen dhe certifikimin e rezultateve do të procedojnë pas përfundimit të afateve të përcaktuara për ankesa në PZAP dhe Gjykatën Supreme.

E në Gjykatën Supreme tashmë është ankuar Koalicioni PDAK-LpB. Zëdhënësja e Supremes, Antigona Uka- Lutfiu, tha për RTV21 kjo ankesë është në shqyrtim e sipër.

“Gjykata Supreme, lidhur me Zgjedhjet Nacionale deri me sot ka pranuar gjithsej 43 ankesa administrative nga subjektet politike/kandidatët, kundër vendimeve të PZAP-së. Për 42 ankesa është vendosur, derisa ankesa e fundit e paraqitur nga PDAK-LPB në Ferizaj, e pranuar dje, është në procedurë për vendosje. Ankesa ka të bëjë me rezultatet e QNR-së, për votat e diasporës, me postë”, tha Uka.

Komisioni Qendror i Zgjedhjeve kishte përfunduar numërimin e votave të mërkurën e javës së kaluar por që më pas u vendos për rinumërimin e disa vendvotimeve si dhe disa votave të pavlefshme nga votimi me postë.

BKT Kosova vlerësohet për herë të tretë "Banka e Vitit 2023 në Kosovë" nga The Banker

Sponsoruar