Lajmet për largimet e shqiptarëve që duan të emigrojnë në Amerikë janë bërë të shpeshta ditët e sotme.

Të rralla janë herët kur dëgjojmë për të huaj që vendosin të kalojnë jetën e tyre në Shqipëri, i tillë është Mark Stocher.

Për afro 30 vite Marku jeton në Ersekë, bashkë me familjen e tij.

-Advertisement-

“Unë erdha kur isha 28 vjeç këtu në Shqipëri dhe tani jam këtu për plot 28 vite. Sa u hap Shqipëria, në 1992 për herë të parë erdha në Korçë me një grup të huaj dhe me pëlqeu mikpritja që kishin shqiptarët. Në atë kohë nuk kishim hotel dhe shqiptarët na kanë lejuar të rrinë në shtëpitë e tyre”, tregoi ai.

Mark luajti një rol të veçantë në luftën e Kosovës, duke ndërtuar një ndërtesë për strehimin e tyre në Ersekë.

“Një kohë e vështirë ka qenë me kosovarët. Gjatë kohës se tyre kishim kontakte me shume njerëz nga bota, pamë gjithë botën që po ndihmonte ne atë situatë. Që nga ajo kohë morëm një godinë, dhe kemi bërë gati për refugjatët”, shprehet ai.

Sot ajo ndërtesë shërben si kamping për mijëra fëmijë nga e gjithë Shqipëria që kalojnë verën, por e për edukimin e studentëve nga gjithë kontinentet.

“Kampi është ndërtuar në vitin 1999 për kosovarët, por është rregulluar si kamp e që nga viti 2000 deri vjet kemi pasur kamp. Mbi 1000 fëmijë në verë, kur nuk ka Covid deri në 2000, nga 150-200 fëmijë në javë. Këtu argëtohen, bëjnë gjëra të ndryshme. Kemi lundrim, kemi lojëra nga më të ndryshme”, tregoi ai më tej.

Gjëja më pozitive e shqiptarëve në sytë e tij është zemërbutësia.

“Më pëlqen zemërbutësia do thosha, kujdesi që kanë për të tjerët. Ne jemi pranuar si në shtëpi, kemi shumë miqësi, njerëzit kujdesen për ne në mënyrë të jashtëzakonshme”, tha ai.

Mesazhi i tij për shqiptarët është të mos largohen nga vendi e ruajnë familjen tradicionale.

“Do thosha mos harroni gjërat që keni. Emigrimi është shumë i vështirë për brezin e parë dhe mund të humbni familjen. Një nga gjërat më të bukura që kam parë në Shqipëri është sa lidhur është familja. Kjo ka filluar të ndryshojë, ne e dimë. Familja që keni këtu është diçka që nuk duhen lënë mbrapa”, përfundoi ai./euronews.al/

Comodita Home rikthen “Garage Sale” për edicionin e tetë, me zbritje deri në 70%

Sponsoruar

-Advertisement-