Lajme

Një i vdekur nga tërmeti i fuqishëm në këtë vend

Autori: Gazeta inFokus 14:12 | 05 May 2023

Një tërmet i fuqishëm goditi Japoninë qendrore të premten, duke lënë të paktën një person të vdekur dhe 21 të lënduar.

Tërmeti me magnitudë 6.5 shkallë goditi rajonin qendror Ishikawa në mesditë, në një thellësi prej 12 kilometrash, sipas Agjencisë Meteorologjike të Japonisë.

Zyrtarët e motit paralajmëruan banorët për dridhje të tjera të mundshme dhe rrëshqitje të dheut në ditët në vijim, por thanë se nuk kishte rrezik për cunami.

-Advertisement-

“Ishte një dridhje e madhe dhe e gjatë që zgjati rreth dy minuta. U ndjeva i frikësuar sepse lëkundjet vazhduan dhe vazhduan,” i tha transmetuesit publik një zyrtar i qeverisë lokale në qytetin e Suzu, i cili nuk pranoi të jepte emrin e saj.

Zëdhënësi i qeverisë, Hirokazu Matsuno, u tha gazetarëve në kryeqytetin Tokio se një person u raportua i vdekur dhe se kishte “raportime të shumta për ndërtesa të shembura”.

“Viktima ra nga një shkallë”, tha për AFP-në një zyrtar i menaxhimit të krizës, duke shtuar se 21 persona të tjerë ishin plagosur.

Agjencia lokale e menaxhimit të zjarrit dhe fatkeqësive tha se të paktën tre ndërtesa ishin shkatërruar me dy persona të bllokuar brenda.

Njëri ishte nxjerrë nga rrënojat dhe ishte dërguar në spital dhe ekipet e shpëtimit po kërkonin tjetrin.

Shërbimi Gjeologjik i SHBA-së e vendosi magnitudën në 6.2 dhe tha se tërmeti goditi në bregdet, por Agjencia Meteorologjike e Japonisë tha se epiqendra e tërmetit ishte në tokë.

Ministri japonez i parandalimit të fatkeqësive, Koichi Tani tha se kishte raporte për rrëshqitje të shumta dheu dhe disa vendas ishin strehuar në strehimoret e evakuimit.

Tërmetet janë të zakonshme në Japoni, e cila ndodhet në “Unazën e Zjarrit” të Paqësorit, një hark aktiviteti intensiv sizmik që shtrihet në Azinë Juglindore dhe në të gjithë pellgun e Paqësorit.

Japonia u godit nga një tërmet masiv nënujor me magnitudë 9.0 ballë në verilindje të saj në mars të vitit 2011, i cili shkaktoi një cunami që la rreth 18.500 njerëz të vdekur ose të zhdukur.

Cunami i vitit 2011 gjithashtu shkriu tre reaktorë në centralin bërthamor të Fukushimës të Japonisë, duke shkaktuar fatkeqësinë më të keqe të vendit të pasluftës dhe aksidentin më të rëndë bërthamor që nga Çernobili./REL

Subscribe në YouTube: GAZETA INFOKUSI