Lajme

Ngriti flamurin “Autochtonous” gjatë vizitës së Kurtit, Policia maqedonse vihet në kërkim të autorit

Autori: Gazeta inFokus 16:56 | 19 August 2023

Ministria e Brendshme e Maqedonisë së Veriut nuk po arrin të identifikojë personin që ngriti flamurin me hartën e Shqipërisë së Madhe në tubimin e datës 11 gusht, kur në Tetovë ishte i ftuar kryeministri i Kosovës, Albin Kurti.

Për këtë, policia ka publikuar një fotografi të personit duke kërkuar ndihmën e qytetarëve të cilët i fton që të informojnë stacionin policor më të afërt nëse kanë informacion.

Për dy kryetarët e komunave Çair dhe Tetovë tashmë janë ngritur kallëzime penale për mos respektim të ligjeve të vendit duke shpalosur vetëm flamurin shqiptar dhe jo edhe atë shtetëror.

-Advertisement-

Vizita pak ditë më parë e Albin Kurtit në komunat me shumicë shqiptare në Maqedoninë e Veriut u shoqërua me debate në opinionin publik maqedonas, shkak për këtë u bë valëvitja e flamurit të Shqipërisë së Madhe dhe sipas krerëve më të lartë të politikës në Maqedoninë e Veriut sjellja e përdorur gjatë asaj vizite ishte nacionaliste.

Reagime të ashpra pati edhe në Beograd, ku presidenti serb, Aleksandar Vuçiç akuzoi kryeministrin Kurti se përbën kërcënim për shtetet fqinje ku banojnë shqiptarët./Euronews Albania/

Subscribe në YouTube: GAZETA INFOKUSI