Lajme

Nesër fillon festivali i monodramës ‘MonoAkt’ në Pejë

Autori: Gazeta inFokus 13:43 | 15 June 2017

Këtë vit ky festival shënon edicionin e nëntë, dhe kësaj radhe vjen me shfaqje të shumta nga vende të ndryshme. Në konferencën e mbajtur sot në Teatrin Dodona, drejtori i festivalit Mentor Zymberaj shpalosi programin e festivalit dhe të veçantat e këtij edicioni, shkruan KultPlus.com

Gjithçka filloi 10 vite më parë kur monodramat “Kronisti i të vrarëve” dhe “Andrra e fundit” arritën suksese të mëdha ndërkombëtare.

Çmimin “UNESCO” që fitoi monodrama ”Andrra e Fundit” bëri që në Kosovë të krijohet Festivali i Monodramës MonoAkt.

-Advertisement-

Këtë vit ky festival shënon edicionin e nëntë, andaj kësaj radhe ky festival vjen me shfaqje të shumta nga vende të ndryshme.

Gjashtë shfaqjet kryesore që do të marrin pjesë në këtë festival janë: “Mbretëresha e Bosnjës” nga Bosnja, “Loja e Pafund” nga Kosova, “BOBOQKA”nga Kroacia, “Fëmija i egër në qyete” nga SHBA, dhe monodrama nga Polonia,“Nga Përpara dhe nga prapa”.

Sipas drejtorit të festivalit Mentor Zymberaj, “Monoakt” është mundësi e mirë që artistët ndërkombëtar të krijojnë një imazh të mirë për vendin tonë.

“Qëllimi ynë ka qenë të sjellim monodrama më të realizuara dhe më të suksesshme të niveleve ndërkombëtare. Ne ia kemi arrit qëllimit dhe vërtet jemi të kënaqur me një konkurrencë të jashtëzakonshme që kemi me konkurrentët ndërkombëtar”, tha Zymberaj duke shtuar se deri më tani në këtë festival kanë marr pjesë pothuajse 50 shtete. Ai shpreson që viteve në vijim të mund të përfshijnë edhe shtete të tjera të cilat deri më tani nuk kanë marr pjesë në festivalin e monodramës “Monoakt”.

Përveç garës mes konkurrentëve në monodramë, do të ketë edhe garë në monostrip si dhe vizita në vendet më turistike në Kosovë. Në kategorinë e monostripit do të garojnë 10 interpretues nga Kosova.

Festivali “MonoAkt” do të hapet nesër me shfaqjen mysafire “Anonimi i Venedikut” dhe do të zgjasë 4 ditë radhazi./KultPlus.com