Lajme

“Nëse Kushtetuesja vendos ta kthejë procesin në zero, Vjosa Osmani nuk do të duhej ta rikandidonte për presidente”

Autori: Gazeta inFokus 23:59 | 18 April 2023

Njohësi i çështjeve juridike, Mazllum Baraliu, ka thënë në emisionin DPT te Fidani në T7 se nëse Gjykata Kushtetuese vendos në të mirë të ish-deputetit Veton Berisha për çështjen e ulëses së deputetit të minoriteteve dhe në këtë rast procesi për zgjedhjen e presidentit do të kthehej në pikën zero, atëherë Vjosa Osmani nuk do të kishte të drejtë etiko-morale të rikandidonte për postin e presidentes.

“Nëse Gjykata Kushtetuese, do të marrë një vendim kështu ose ashtu. Presidentja duhet të veprojë. Çështja e dorëheqjes nuk është me Kushtetutë, por kemi raste kur presidentët janë shkarkuar”, tha ai.

“Kemi një sistem ku presidenti zgjidhet nga Kuvendi e jo direkt nga populli. Mund të ketë zgjedhje në një opsion kur presidentja të shkarkohet ose të dorëhiqet. Moralisht dhe proceduralisht do të ishte jashtë kontekstit që të kthehet përsëri. Pas një dorëheqje morale ose shkarkimi të kthehet përsëri si kandidate. Ky koalicion mund ta ketë një kandidat tjetër”, shtoi Baraliu.

-Advertisement-

Gjithsesi ai thotë se në politikën kosovare gjithçka është e mundur dhe në këtë rast nuk mund të thotë decidivisht se çfarë mund të ndodhë.

“Në aspektin etiko-moral, nëse dikush shkarkohet ose dorëhiqet, atëherë nuk mund të kthehet aty. Por në politikën tonë, që për pushtet më shumë vrajnë mendjen dhe vrapojnë, atëherë është e mundur të ndodhë gjithçka. Por unë mendoj se një gjë e tillë riktihmi në gjendjen fillestare do të duhej të mos ndodhte”, përfundoi ai.

Subscribe në YouTube: GAZETA INFOKUSI