Lajme

Në Spanjë nuk mund të udhëtoni as pas liberalizimit të vizave

Autori: Gazeta inFokus 14:06 | 02 October 2023

Udhëtimi pa viza për Kosovën do të nisë prej 1 janarit të vitit 2024. Liberalizimi vlen për të gjitha vendet e zonës Schengen, por, bartësit e pasaportave të Kosovës, nuk do të mund të udhëtojnë në Spanjë

Arsyeja pse nuk do të mund të udhëtoni në Spanjë, është sepse ky shtet anëtar i Bashkimit Evropian, nuk i njeh pasaportat kosovare.

Në mesin e vendeve tëSchengenit, të gjithë, pos një vendi, i kanë njohur dokumentet e udhëtimit të Kosovës. Kjo do të thotë se liberalizimi i vizave për Kosovën do t’iu mundësojë bartësve të pasaportave të Kosovës që të udhëtojnë pa viza në të gjitha këto vende, pos në njërin prej tyre, Spanjës.

-Advertisement-

Spanja, është më e zëshme sesa katër vendet tjera të BE-së që nuk e kanë njohur shtetësinë e Kosovës. Megjithatë, gjatë procesit të miratimit të vendimit për vizat, Spanja nuk ka kundërshtuar.

Vendet tjera mosnjohëse të shtetësisë së Kosovës janë: Greqia, Qiproja, Rumania dhe Sllovakia.

Ato i njohin pasaportat e lëshuara nga autoritetet e Kosovës.

Më 18 prill, Parlamenti Evropian e ka miratuar vendimin për vizat, ndërsa dokumenti është nënshkruar më 19 prill.

Vendimi parasheh që qytetarët e Kosovës, të udhëtojnë pa viza në vendet e zonës Schengen, prej 1 janarit të vitit 2024.

Regjimi pa viza mundëson udhëtime vetëm deri në 90 ditë – brenda gjashtë muajsh – në cilindo nga shtetet anëtare të zonës Schengen.

Udhëtimet pa viza duhet të shërbejnë për vizita turistike, çështje familjare ose të ngjashme, dhe në asnjë rast nuk nënkuptojnë leje pune ose përfitime të tjera.

Kosova, aktualisht, është vendi i vetëm në Ballkanin Perëndimor, qytetarët e të cilit nuk mund të lëvizin lirshëm në zonën Schengen.

Subscribe në YouTube: GAZETA INFOKUSI