Lajme

Në Fushë Kosovë nuk po mbahet mësimi online, kërkohet shkarkimi i drejtorit të arsimit

Autori: Gazeta inFokus 13:36 | 19 November 2020

Partia Demokratike e Kosovës (PDK) në Fushë Kosovë ka kërkuar që drejtori i Arsimit në këtë komunë, Islam Shabani, të jap dorëheqje.

Sipas PDK-së  mësimi online ka 14 ditë që nuk është duke u mbajtur në Shkollën Fillore të Mesme të Ultë “Mihal Grameno”

“Tash e katërmbëdhjetë ditë nuk është zhvilluar mësimi online në SHFMU ‘Mihal Grameno’ të Fushë Kosovës. Që nga mbyllja e saj për shkak të koronavirusit nuk është mbajtur asnjë orë me platformën zoom, geogle etj. ashtu siç edhe parashihet me planin e Ministrisë së Arsimit. Janë humbur plot 5200 orë mësimore gjatë kësaj periudhe. Është e papranueshme që rreth 3400 nxënës të mbesin pa mësim, shkaku i neglizhencës dhe i papërgjegjësisë së DKA-së në Fushë Kosovë, e cila nuk është në gjendje ta menaxhojë arsimin as në kushte normale. Nxënësve u është thënë vetëm ta përcjellin nga televizonet mësimin, por nuk ka pasur asnjë mbikëqyrje apo angazhim të mësimdhënësve në këtë proces”, thuhet në komunikatë

Sipas tyre DKA ka dështuar në përmbushjen e detyrave të saj, andaj drejtori i arsimit në Fushë Kosovë, Islam Shabani, duhet të japë dorëheqje.

Ndërkaq, kanë kërkuar që sa më shpejt të fillojë mbajtja e mësimit online./Gazeta inFokus/

 

 

Të tjera