Në ndërtesën e Qeverisë, u organizua sot pritje në shënim të Ditës së Fitores në Evropë, në 80-vjetorin e mbarimit të Luftës së Dytë Botërore, në prag edhe të shënimit të Ditës së Evropës. Kryeministri në detyrë i Republikës së Kosovës, Albin Kurti, bashkë me kabinetin qeveritar, mirëpriti ambasadorë e përfaqësues të misioneve diplomatike në vendin tonë.

“Në rastin historik të Ditës së Fitores tetëdhjetë vjet më parë, festimet që shënuan fundin e luftimeve u përhapën jo vetëm nëpër kontinent, por në mbarë botën. Gëzimi dhe lehtësimi i miliona ushtarëve dhe qytetarëve të zakonshëm ishte i kuptueshëm, duke pasur parasysh koston marramendëse njerëzore të luftës. Deri më sot, mbetet konflikti më vdekjeprurës në historinë njerëzore, me rreth 70–85 milionë jetë të humbura, mbi 60% prej të cilëve ishin civilë. Vetëm në Holokaust, gjashtë milionë hebrenj dhe miliona të tjerë u vranë.” u shpreh kryeministri në hyrje të fjalës së tij.

Kryeministri tha se çdo përpjekje për të gjetur shpresë në atë katastrofë duhet të fokusohet kryesisht në përpjekjet e pasluftës për të parandaluar që diçka e tillë të mos ndodhë përsëri.

“Mes rrënojave morale të luftës, u mbollën farat e paqes. Dekadat pas Luftës së Dytë Botërore panë themelimin e institucioneve madhore ndërkombëtare për të drejtat e njeriut, demokracinë, paqen dhe bashkëpunimin.” tha kryeministri Kurti.

Në vijim, kryeministri theksoi se tetëdhjetë vjet pas përfundimit të Luftës së Dytë Botërore në Evropë, ka shenja se duhet të dyfishojmë përpjekjet tona për të përforcuar dhe zgjeruar këto institucione thelbësore duke përfshirë shtete të tjera demokratike, sikurse Kosova. Shtoi se invazioni i pajustifikuar i Rusisë ndaj Ukrainës është një kërcënim i vazhdueshëm për paqen në kontinentin tonë e ndryshe nga Lufta e Dytë Botërore, kërcënimi i agresionit tashmë vjen nga jashtë kontinentit tonë dhe jo nga brenda.

“Nuk kam asnjë dyshim se këto kërcënime mund t’i kapërcejmë së bashku. Evropa ka burime për mbrojtje dhe ide për përparim. Gjithçka që duhet është vullneti për bashkëpunim dhe ndjenja e solidaritetit. Prandaj, në këtë tetëdhjetëvjetor të Ditës së Fitores, jemi të thirrur jo vetëm të përkujtojmë të kaluarën, por edhe të mbrojmë të ardhmen.” përfundoi fjalën e tij kryeministri Kurti.

Po, Po 31 Vetura Dacia Logan shpërblim për konsumator nga ETC

Sponsoruar