Lajme

Ndryshimet në skemën pensionale, SBASHK kërkon nga grupet parlamentare opozitare ta dërgojnë në Kushtetuese

Autori: Gazeta inFokus 16:42 | 02 Shkurt 2024

Përfaqësuesit e SBASHK-ut sot janë takuar me kryetarin e Komisionit parlamentar për Arsim, Ardian Gola, për, siç tha, të shprehur shqetësimet lidhur me ndryshimet që janë bërë në skemën pensionale që kanë prekur në të drejtat e fituara të punëtorëve të pensionuar arsimorë.

Pas takimit me Golën, SBASHK u ka dërguar shkresa për takime shefave të grupeve parlamentare Mimoza Kusari Lila, Abelard Tahiri, Arben Gashi, Besnik Tahiri e Enis Kervan.

Ndërkaq, nga grupet parlamentare opozitare kanë kërkuar që të marrin iniciativën dhe të dërgojnë atë në Gjykatën Kushtetuese.

-Advertisement-

“Kërkesës së SBASHK-ut i janë përgjigjur këtë premte shefi i Grupit Parlamentar të PDK-së, Abelard Tahiri dhe përfaqësuesi i Grupit parlamentar të LDK-së, Driton Selmanaj. Kryetari i SBASHK-ut Rrahman Jasharaj bashkë me koordinatorin për organizim të brendshëm Ymer Ymeri dhe zyrtarin ligjor Blendor Shatri në takime të ndara u kanë ofruar argumente, të cilat ua kanë lënë edhe në formë të shkruar, z. Abelard Tahirit dhe z. Driton Selamanajt duke i lutur që të analizojnë këto fakte dhe të nisin iniciativën për të dërguar çështjen në Gjykatën Kushtetuese dhe për të nisur debat në Parlament në mënyrë që të evitohen lëshimet në ndryshimet e bëra në Ligjin për skemat pensionale të financuar nga shteti dhe t’u kthehet e drejta e fituar punëtorëve të pensionuar nga arsimi”, thuhet në njoftimin e sindikatës.

SBASHK tha se pret që javën e ardhshme të kenë takime edhe me shefen e Grupit Parlamentar të Vetëvendosjes Mimoza Kusari-Lila, të AAK-së Besnik Tahiri dhe të Grupit Parlamentar Multietnik Enis Kervan./