Statuti i Trepçës ka hyrë në fazën përfundimtare të miratimit.

Ibrahim Rexhepi, këshilltar politik i ministrit të Zhvillimit Ekonomik, Valdrin Lluka thotë se statuti tani është në duart e deputetëve të Kuvendit të Kosovës, të cilët kanë mundësinë që të ndërhyjnë, ta plotësojnë dhe të nxjerrin dokumentin final.

Sipas zhvillimeve të deritashme, ai vlerëson se kjo nuk do të jetë punë e lehtë, meqenëse vijnë shumë kërkesa, posaçërisht nga minatorët, të cilët  vazhdimisht kërcënojnë me greva e me protesta.

-Advertisement-

“Duke pasur parasysh natyrën dhe përmbajtjen e këtij dokumenti, ndoshta është vështirë që aty të inkorporohen të  gjitha kërkesat, por debatet assesi nuk duhet të ndërpriten, me të vetmin qëllim për gjetjen e zgjidhjeve sa më të pranueshme. Për këtë arsye edhe Sindikata e Minatorëve  të Trepçës, e cila është pjesë e këtyre debateve, duhet të jep pak kohë për punë pa presione e tensioni”, thotë Rexhepi për Gazetën Fokus.

Ministria e Zhvillimit Ekonomik kërkon nga minatorët që të heqin dorë nga grevat e protestat së paku për dy javë, që sipas Rexhepit do të ishte kohë e mjaftueshme për punën që duhet të bëhet në komisione parlamentare, në grupet dhe mekanizmat e tjera të Kuvendit të Kosovës, ashtu që të nxjerrin një dokument sa më përmbajtjesor dhe të pranueshëm për të gjitha palët.

“MZHE  asnjëherë nuk ka qenë kundër kërkesave të arsyeshme të minatorëve dhe vazhdimisht do të insistoj që disa çështje që nuk mund të inkorporohen në statut, e që kryesisht janë të natyrës sociale, të zgjidhen përmes rrugëve të tjera, përkatësisht me ligj”, thotë Rexhepi.

Kjo qasje Rexhepi thotë se ofron mundësinë që sa më parë të miratohet  Statuti i Shoqërisë Aksionare “Trepça”, të bëhet regjistrimi i saj, të zgjidhen institucionet menaxhuese dhe të nisë procesi i ri, ai i rritjes dhe i zhvillimit. Nga ana tjetër mund të punohet në mënyrë intensive edhe në trajtimin e çështjeve sociale, të cilat i ngritë Sindikata e Minatorëve të “Trepçës”. /Gazeta Fokus/

Comodita Home rikthen “Garage Sale” për edicionin e tetë, me zbritje deri në 70%

Sponsoruar

-Advertisement-