Lajme

Mustafa: Asnjë mocion nuk i shpëton ata që vodhën milionat e shtetit!

Autori: Gazeta inFokus 13:46 | 06 May 2017

Pas lëvdatave për punën e Qeverisë, tani Kryeministri i Kosovës Isa Mustafa ka komentuar edhe mocionin e mosbesimit ndaj qeverisë që ai e drejton, inciativë kjo e partive opozitare të Kuvendit të Kosovës.

Kryeministri Mustafa, thotë se ka pasur pritje që në përmbajte të mocionit të paraqitet puna e keqe e qeverisë apo mos realizimi i premtimeve të tyre, e jo vjedhjet, abuzimet e aferat me të cilat, sipas Mustafës “asnjë vendim dhe anëtar i kësaj Qeverie s’ka të bëjë.”

Më tej ai ka theksuar se asnjë mocion kundër Qeverisë nuk i shpëton ata që mendojnë të plaçkisin 30 milion euro nga Telekomi i Kosovës, “ata që ia bënë shtetit faturën e pasaportave mbi 5 milion euro apo ata që shpresojnë se do ta plaçkisin shtetin edhe përmes Axosit, nëse kjo Qeveri bie”, ka shkruar Mustafa përmes një postimi në faqen e tij zyratare në rrjetin social Facebook.

-Advertisement-

Skandali me pasaporta dhe ai me PTK-në kanë ndodhur gjatë kohës kur Hashim Thaçi ishte Kryeministër i Kosovës dhe drejtonte Partinë Demokratike të Kosovës.

Qeveria aktuale vazhdon të përballet me dy procese prej të cilave detyrohet të paguajë miliona euro. Është rasti i pasaportave ku Qeveria do të detyrohet të paguajë më shumë se 5 milionë euro kompanisë austriake OESD për shkak të skandalit me pasaporta. Skandali i dytë ka të bëje me PTK-në. Edhe në këtë rast, Qeveria do të detyrohet të paguajë 30 milionë euro kompanisë Devolli për të mos lejuar falimentimin e PTK-së, e cila s’kishte respektuar një kontratë me Z Mobile, e që Gjykata e Arbitrazhit kishte dënuar kompaninë publike me dhjetëra milionë euro.

Subscribe në YouTube: GAZETA INFOKUSI