Ministri i Financave, Hekuran Murati, ka mbajtur sot një konferencë për media bashkë me Shefin e Zyrës së BE-së në Kosovë, Tomas Suzyong, në prag të përfundimit të subvencionimit të faturave elektrike nga Bashkimi Evropian.

Murati tha se falë subvencionimit të faturave elektrike për rreth 200 mijë familje, në tre muajt e parë nga Qeveria  dhe më pas katër të tjerë nga BE-ja, ky dimër, konsideroi ai, ka qenë ndër më të lirët sa i përket çmimit të energjisë elektrike.

“Subvencionimin e kursimit të energjisë, të cilën e kemi lansuar në muajin shtator fillimisht si pilotim dhe si testim e që për tre muajt e parë është financuar nga buxheti i shtetit dhe më pastaj gjatë diskutimeve që kemi pasur me Bashkimin Evropian, është përfshirë në pakon mbështetëse të Bashkimit Evropian, që është miratuar në vlerën prej 75 milionë eurosh. Kësisoj, katër muajt e ardhshëm janë financuar nga BE, dhe si rezultat muajt shtator, tetor dhe nëntor janë financuar nga Qeveria, kurse në muajt dhjetor, janar, shkurt dhe mars, mbulimi është bërë nga fondet e BE-së, në shumën prej 15 milionë eurosh. Sot apo nesër qytetarët do ta pranojën edhe subvencionin dhe kjo do të jetë përmbyllja e kësaj mase të kursimit, e cila ka qenë për sezonin dimëror të këtij viti”, tha Murati.

Ministri tha se me ndihmën e fondeve të BE-së janë paraparë edhe pako të tjera.

“Normalisht do të ketë edhe pako të tjera të cilat janë të parapara me pakon e BE-së, janë paraparë edhe 25 milionë euro tjera që do të jenë përgjatë vitit, pra mbështetje për familjet  e cenueshme apo familjet në nevojë, në mënyrë që të kalohet sa më lehtë barra e faturave elektrike”, deklaroi ai.

Tutje, shefi i kuletës së shtetit tha se si rezultat i subvencionimit, janë kursyer 88 milionë euro nga importi.

“Ka qenë mbi 200 mijë numri i familjeve që kanë përfituar çdo muaj dhe kanë qenë të kursyera shumë e shumë kë/h, të cilat nuk i kemi importuar. Po të ishin importuar gjithë ato kë/h, do të figuronte një import shtesë prej 88 milionë eurosh. Pra përmes kësaj mase mund të themi se kemi kursyer 88 milionë euro nga importi. Konsideroj se ky dimër, për rreth 200 mijë familje që kanë përfituar nga subvencionimi, ka qenë ndër dimrat më të lirë sa i përket kostos së energjisë eltrikrike. E falënderoj BE-në, si dhe qytetarët për vetëdijësim për kursim të energjisë elektrike”, u shpreh më tej ministri.

Çka do të thotë të gatuash shqip?

Sponsoruar