Valon Murati, kryetar i Lëvizjes për Bashkim, ka thënë se në Kosovë tash është momenti i duhur për një qeveri uniteti të përbërë nga krejt partitë politike shqiptare.

Sipas tij, Kosovës i duhet qeveri uniteti për të ndërtuar platformë për bisedime, e që brenda saj do të përmbante edhe Kosovën Lindore.

“Që nga themelimi i kësaj qeverie, forcat politike shqiptare përmes mungesës së vizionit për të ndërtuar një qeveri uniteti, kanë fuqizuar pozicionet e Listës Serbe. Kjo u pa edhe sot, në lojërat aspak parimore në mes të pozitës dhe opozitës në Kuvendin e Kosovës. Ky është momenti i duhur për të gjitha partitë politike parlamentare për ta tejkaluar veten dhe për të shkuar drejt një qeverie uniteti e përbërë nga krejt partitë politike shqiptare”, ka shkruar Murati në një postim në Facebook. “Në këto rrethana kjo qeveri do të duhej ta kishte një mision: hartimin e platformës politike për bisedime me Serbinë dhe përpjekjen për të përmbyllur këto bisedime”.

-Advertisement-

Ai ka shtuar se në qendër të platformës, LB beson se duhet të jetë parimi i reciprocitetit në të drejta për shqiptarët në Kosovën Lindore me atë të serbëve në tri komunat veriore të Kosovës.

“Zbatimi me konsekuencë i këtij parimi do të çonte edhe në ridefinimin e kufijve në mes të dy popujve dhe shteteve duke u bazuar në vullnetin e tyre në këto pjesë përkatëse”, ka shtuar ai.

Sipas Muratit, “beteja politike në mbrojtje të ‘integritetit territorial’ të Kosovës e në dëm të Kosovës Lindore dhe funksionalizimit të shtetit të Kosovës duhet të pushojë”.

Ai ka thënë se një qeveri e unitetit duke hartuar platformë të përbashkët do të ndërtonte edhe ekipin i cili do të përfaqësonte Kosovën, duke i eliminuar nga ky proces të gjithë ata që nuk e kanë besimin e forcave politike për këtë proces politik.

“Rrugët tjera do të na çojnë në vazhdimin e konflikteve të brendshme, përpjekjen për të fituar poena politik nga situate aktuale, fuqizim të Listës Serbe dhe humbje e rastit që përmes një zgjidhjeje të duhur në bisedime të funksionalizojmë shtetin e Kosovës dhe ta hapim rrugën për bashkimin në mes të Kosovës dhe Shqipërisë”, ka thënë në fund Murati.

Comodita Home rikthen “Garage Sale” për edicionin e tetë, me zbritje deri në 70%

Sponsoruar

-Advertisement-