Lajme

Mungojnë 3 të akuzuarit, shtyhet seanca për veteranët që protestuan para 6 viteve

Autori: Gazeta inFokus 12:49 | 19 February 2021

Në Gjykatën Themelore në Prishtinë sot është mbajtur seanca e katër me radhë ndaj 11 veteranëve dhe invalidëve të Ushtrisë Çlirimtare të Kosovës (UÇK), të cilët po akuzohen për organizim të një proteste në gushtin e vitit 2015-të. Të pranishëm në sallë sot nuk ishin të gjithë të akuzuarit dhe si pasojë u mbyll kjo seancë për të vazhduar më 14 prill. Por shkas për tu mbyllur kjo seancë gjyqësore ndaj veteranëve protestues ishte edhe mos ofrimi i raportit që tregon vlerën e dëmit nga pala e dëmtuar që në këtë rast është Qeveria e Kosovës.

Ekrem Xheladini, Skender Llugiqi dhe Arsim Hopp nuk morën pjesë në shqyrtimin fillestar të sotëm të këtij procesi gjyqësor.

Avokati i Qeverisë së Kosovës, Bedri Krasniqi tha se janë në procedurë të mbledhjes së fakteve për të vërtetuar dëmin e shkaktuar.

“Pala e dëmtuar është në procedurë të mbledhjes së fakteve me qëllim të ta faktoj faktin lidhur me dëmin e shkaktuar mbi bazën e veprës penale që rrjedh nga akuza e prokurorit të shtetit, deri më tani nuk e kemi përcaktuar. Deri më tash nuk mund ta precizojmë“, tha ai.

E pas kësaj deklarate, kryesuesja e trupit gjykues, Lumturije Krasniqi tha se në mungesë të kushteve seanca e shqyrtimit fillestar për këtë rast do të mbyllet. Seanca e radhës u caktua më datën 14 pill nga ora 09:00.

“Gjykata mendon se nuk ka kushte për mbajtjen e shqyrtimit fillestar pasi që mungojnë tre të pandehuri Arsim Hopp, Skender Llugiqi dhe Ekrem Xheladini. Si dhe i dëmtuari ende nuk e ka precizuar vlerën e dëmit, që është element esencial i figurës së veprës penale. Gjykata merr aktvendim që seanca e radhës të caktohet më 14 prill në orën 09:00”, tha ai.

Duke e quajtur këtë lëndë si lojë politike, Qeriqi tha se derisa për 6 vite qeveria nuk ka arritur ta hartoj raportin për dëmin e shkaktuar nuk ka nevojë të ftohen seanca të tjera pa u ofrua ky raport. Në të kundërtën ai tha se nuk do merr pjesë në këto seanca.

“Meqenëse nëse nuk gaboj është seanca e katërt që po mbahet edhe përfaqësuesi i qeverisë në vazhdimësi në secilën seancë po arsyetohet se do ta sjellin raportin e dëmit që është bërë në seancën e radhës, janë katër seanca që janë deklaruar njëjtë dhe nuk ka sjell raport. Mua po më duket një lojë kjo që po bëhet me neve është e padrejtë kjo që po ndodh po bëhen gati që 6 vite që akuzohemi nga Qeveria dhe mos me qenë në gjendje me e bë një raport dhe me na maltretuar kjo po më duket një lojë politike e tyre, kisha kërkuar që mos prej juve si gjykatë që mos me thirr seancë pa e sjell raportin Qeveria, mos me na maltretuar deri ë momentin që ofrohet raporti, përndryshe deri në seancën përmbyllëse gjyqtare nuk marr pjesë, sepse është maltretim që po na bëhet”, theksoi Qeriqi.

Në rastin e sotëm gjyqësor për organizimin e protestës së veteranëve e cila ishte mbajtur në Prishtinë, ku përmes atij organizimi, veteranët kërkonin të drejtat ligjore për kategoritë e luftës të UÇK-së po akuzohen Xhevdet Qeriqi, Nusret Azemi, Driton Sadiku, Zymer Ahmeti, Fahri Zeqiri, Arsim Hopp, Skender Llugiqi, Ekrem Xheladini, Muhamet Kuka, Bahti Danushi.

Të tjera