Lajme

Muharremi: Qeveria s’mund ta mbyllë një media – rasti i Klan Kosovës, gabimi i dytë më i madh i qeverisë

Autori: Gazeta inFokus 10:59 | 31 July 2023

Njohësi i integrimeve evropiane, Shenoll Muharremi, ka thënë se qeveria nuk mundet me e mbyllë një media, teksa u shpreh i sigurt se kjo nuk do të ndodhë në Kosovë.

Ai tha se akti i qeverisë me Klan Kosovën është një fenomen ku qeveria e luan rolin e gjykatave dhe prokurorëve.

“Qeveria nuk e bënë gjyqin. Këtu është një keqkuptim dhe gabim trashanik i qeverisë. Pas gabimeve dhe avanturave në veri që na rrezikuan seriozisht sigurinë kombëtare, menaxhimi i rastit të Klan Kosova është gabimi i dytë më i madh i Albin Kurtit dhe qeverisë”, tha Muharremi.

-Advertisement-

Tutje, Muharremi tha se rasti “Klan Kosova”, lehtësisht mund të jetë një kurth për mobilizimin e militantëve të pushtetit para zgjedhjeve eventuale në vjeshtë.

“Problemi është që kjo fiskulturë e rrezikshme po bëhet në dëm të publikut dhe Kosovës. Gjithsesi duhet të respektohet ligji, por jo vetëm për disa specifikisht. Patjetër duhet të japin llogari të gjithë që mund të kenë abuzuar me pushtetin dhe paranë publike, por jo në formë selektive dhe për interese politike”, tha ai.

Më tej, ai tha se besimi dhe kredibiliteti tek qeveria po zbehet çdo ditë e më shumë, teksa sipas tij, kjo do të reflektohet në zgjedhjet e ardhshme.

“Nuk besoj që z. Kurti me metodat dhe taktikat që po përdorë mund të qeverisë më Kosovën. Ai mund të ketë rol me rëndësi, por jo si kryesues i qeverisë”, tha Muharremi.

Subscribe në YouTube: GAZETA INFOKUSI