Ministria e Punëve të Jashtme të Kosovës ka dalë me njoftim lidhur me rastin e arrestimit të ish-ushtarit të UÇK-së, Hasan Dakaj, ditë më parë derisa ka provuar të hyjë në Serbi përmes pikës kufitare në Merdarë.

MPJ ka thënë se kreu i Zyrës Ndërlidhëse të Kosovës në Beograd e ka vizituar Dakajn në qendrën e Paraburgimit në Beograd ku ai po mbahet.

Ministria e Jashtme në komunikatë potencon se gjatë vizitës që i është bërë sot më 10 janar, Dakaj e ka konfirmuar po akuzohet nga Prokuroria e Lartë për Krime të Luftës e Beogradit për gjoja krime të luftës kundër popullsisë jo-shqiptare gjatë luftës në Kosovë.

Lidhur me trajtimin e tij në burg, MPJ tregon se vetë Dakaj ka treguar se s’ka përjetuar ndonjë dhunë fizike apo formë tjetër të maltretimit, ndërkohë që i është lejuar të kontaktojë familjen e tij në telefon.

MPJ ka bërë thirrje për qytetarët, sidomos ish-pjesëtarët e UÇK-së, që të kenë kujdes përgjatë kalimit nëpër Serbi dhe kanë dhënë një numër kontakti nëse hasin në vështirësi përgjatë udhëtimit.

Njoftimi i plotë:

Njoftim mbi rastin e arrestimit të z. Hasan Dakaj në Serbi

Në lidhje me rastin e arrestimit të qytetarit të Republikës së Kosovë, z. Hasan Dakaj, në Serbi, ju njoftojmë që Ministria e Punëve të Jashtme dhe Diasporës, Zyra Ndërlidhëse e Republikës së Kosovës në Serbi që nga dita e parë e arrestimit të z. Dakaj ka qenë e angazhuar në këtë rast dhe sot pas miratimit të kërkesës nga autoritetet serbe, ambasadori Jashari ka vizituar qytetarin Hasan Dakaj në Qendrën e Paraburgimit të Gjykatës Speciale për Krime të Luftës të Beogradit, ku z. Dakaj është duke u mbajtur.

Më 6 Janar 2024, në ora 16:00, z. Dakaj ka dalur para gjykatësit të procedurës paraprake, ku i është shqiptuar masa e paraburgimit prej 30 ditëve, respektivisht, deri më 3 Shkurt 2024.

Gjatë vizitës që i është bërë me datë 10.01.2024, z. Dakaj e ka konfirmuar se Prokuroria e Lartë për Krime të Luftës e Beogradit e ngarkon atë për gjoja krime të luftës kundër popullsisë jo-shqiptare gjatë luftës në Kosovë më 1999.

Sa i përket trajtimit të tij, qytetari Dakaj ka theksuar se deri me tani nuk ka përjetuar ndonjë dhunë fizike apo formë tjetër të maltretimit. Ndërkohë, atij i është lejuar të kontaktojë me telefon familjen e tij.

Marrë parasysh fushatën përndjekëse dhe veprimet arbitrare të Serbisë ndaj qytetarëve të Republikës së Kosovës dhe në veçanti atyre që kanë qenë pjesë të luftës çlirimtare, MPJD fton të gjithë qytetarët që të kenë kujdes të shtuar dhe nëse ballafaqohen me vështirësi të natyrave të ndryshme gjatë udhëtimit të tyre nëpër Serbi, që të na kontaktojnë në numrin e telefonit: +383 46 51 00 51.

Ministrja e Punëve të Jashtme dhe Diasporës, Donika Gërvalla, diplomatët dhe përfaqësuesit e Republikës së Kosovës në vazhdimësi para Bashkësisë Ndërkombëtare kanë ngritur shqetësimin mbi veprimet e Serbisë ndaj qytetarëve të Kosovës dhe i bëjnë thirrje që të angazhohen për lirimin e menjëhershëm të qytetarëve, Hasan Dakaj, Nezir Mehmetaj dhe të tjerëve që mbahen në Serbi.

Njëkohësisht të kërkojë përgjegjësi nga shteti serb për këto veprime arbitrare dhe destruktive dhe që bien ndesh me konventat ndërkombëtare për të drejtat e njeriut.

Nis bashkëpunimi serioz dhe strategjik midis Comodita dhe JYSK International

Sponsoruar