Lajme

“M’ka rrahur shtatzënë, m’ka gjuajt përtokë me djalin në krah” – Betime Baftiu rrëfen për dhunën nga burri

Autori: Gazeta inFokus 09:52 | 06 October 2021

Betime Baftiu ka rrëfyer dhunën që ka pasur nga ish-bashkëshorti i saj, përgjatë periudhës derisa kanë qenë të martuar.

Baftiu ka treguar se në fillim është frikësuar se njerëzit mund ta paragjykojnë, por më vonë e ka lajmëruar bashkëshortin në polici.

“Ndoshta jam frikësu pak prej paragjykimeve të njerëzve. Nuk po flas për familjen, sepse e kam përkrahjen e tyre, mirëpo rrethi te ne të bën të mos ndihesh rehat, të tregosh një histori tënden personale, sepse çdo herë do të jesh cak i stigmatizimeve dhe paragjykimeve. Unë personalisht si juriste, meqenëse vetë kam pasur përvoja jo të mira me gjykata, vlerësoj se te ne ka shumë punë sidomos me gjyqtarë dhe prokurorë që merren me rastet e dhunës në familje”, ka deklaruar Baftiu në “Libero”.

Baftiu ka treguar edhe si ka ardhur deri te vendimi për ndarje nga bashkëshorti. Thotë se derisa ka qenë shtatzënë, ai ka ushtruar fizike ndaj saj, por edhe pasi e ka lindur djalin.

“Para se me ndodh rasti i ndarjes, ka pasur dhunë në familje në mënyrë sistematike. Dhunë fizike, psikologjike, dhe jo vetëm te unë por edhe te djali. Kur kam qenë 8 muajsh shtatzënë ka ndodhur hera e parë e dhunës, jam frikësuar që do ta humbi edhe jetën time, edhe të djalit. Mirëpo fati ka dashur me i shpëtu asaj fatkeqësie dhe sot edhe unë edhe djali jemi mirë. Ndoshta jo emocionalisht aq të fortë se nuk është e lehtë me i kalu këto sfida, por pavarësisht të gjithave po ecim përpara…”, ka deklaruar Baftiu.

Ajo ka treguar se ka pasur tradhti bashkëshortore, po ashtu, thotë se bashkëshorti nuk ka lejuar që pasuria e përbashkët të regjistrohet në emër të të dyve.

“Pak ndikon edhe aspekti i civilizimit, mënyra sa është i pjekur bashkëshorti me komuniku me ty, mos me ardhë puna deri te dhuna dhe me e pa çdo zgjidhje të problemit vetëm përmes dhunës, jo me komuniku dhe me e gjetë një zgjidhje të asaj që më brengoste në raste të caktume. Ka pasur tradhti sistematike, fshehje e pasurisë, kam qenë kontributdhënëse drejtpërdrejt në pasuri dhe më është mohuar e drejta që ajo pasuri të regjistrohet në emër të të dyve”, ka deklaruar Baftiu.

Ajo ka rrëfyer edhe momentin e parë kur e ka raportuar bashkëshortin në polici.

“Kanë qenë elemente të shumta, por ajo që më ka detyruar ta marr drejtimin drejt ndarjes dhe ka qenë hera e parë që e kam lajmëruar rastin në polici, kur nuk ka pasur mëshirë dhe më ka hedhur përtokë me djalin në duar, djali ka qenë 3 vjeç e gjysmë. Një baba që s’e ka ndjesinë që mund ta lëndojë djalin e vet…Më tepër se 3 vjet e gjysmë ka zgjatur martesa, në atë periudhë kohore nuk mund ta mohoj, ka pasur edhe momente të mira, por më shumë kanë qenë momente që ndoshta jam frikësu ndonjëherë që kur po vjen në shtëpi, a po vjen me qehren e mirë, mos po ndodh dhuna a çka po ndodh”, ka deklaruar Baftiu.

Të tjera