Misteri pas zhdukjes dhe gjetjes së dy studenteve në Pejë
Autori: Gazeta inFokus 22:50 | 04 October 2022
Gjurma e vetme që Sali Berisha kishte të premten e 23 shtatorit për të bijën e zhdukur, ishte ky mesazh: “Mirë jena, me *** jena. Mos na lypni!”
Pas kësaj, edhe për tetë ditë të tjera asnjë sinjal. Saliu thotë se edhe ky mesazh ka një prapravijë të çuditshme. Saliu i cili të hënën përqafoi për herë të parë të bijën pas zhdukjes, ka dyshime se dikush e mori atë me dhunë.
Historia e dy studenteve nga Peja ngre shumë pikëpyetje që nga momenti i zhdukjes e deri te forma sesi ato u shfaqën të premten e 30 shtatorit në fshatin Bllagajë të Pejës.
Policia e Kosovës ka dhënë shumë pak detaje për historinë e gjetjes së tyre, ani pse ato vetë u paraqiten në stacion policor.
Gjatë kohës sa familja kërkonte pa shpresë një shenjë për të bijën, e ëma e saj gjeti brenda rrobave një dokument që dëshmonte gjoja punën praktike që e reja do ta bënte në një lokal shishabari në Pejë.
Saliu mori atë dokument dhe shkoi të kërkonte informacione në Universitetin “Haxhi Zeka”, në Pejë, ku e bija e tij studion Teknologji Ushqimore.
Kjo letër në të cilën janë listuar emrat e pesë studentëve të këtij departamenti të cilët kinse do të kryenin praktikën në “Barcoden” mban logon e Universitetit të Pejës, por jo edhe vulën e tij. Për më tepër, nga ky universitet e kontestojnë edhe nënshkrimin e zyrtares për karrierë, Leonora Zefi, me të cilën është firmosur ky dokument.
Nga rektorati i këtij universitetit thonë se asnjëherë nuk kanë pasur marrëveshje për punë praktike me lokalin në fjalë.
Ajo që është e vërtetë në historinë mes studenteve të zhdukura dhe “Barcoden-it”, është fakti se ato kishin punuar për një kohë në këtë lokal.
Për KIKS Kosovën pronari i lokalit, Denis Cocaj, ka pranuar se dy studentet i kishte angazhuar si punëtore në lokalin e tij. Ai ka pohuar se me vajzat kishte rënë në kontakt përmes Instagramit dhe se nuk ka dijeni për ekzistencën e letrës. Cocaj thotë se të rejat nuk i ka parë që nga përfundimi i vitit akademik deri në ditën kritike.
Bënë praktikë studentore apo ishin të punësuara me apo pa vullnetin e tyre, misteri thellohet me faktin se një gjë e tillë ishte mbajtur e fshehur për familjet e tyre.
Engimën e rritë një dokument i nxjerrë nga Fakulteti i Agrobiznesit që mban datën 3 tetor, i cili ndër pohon se këtë të hënë studentet u panë në hollin e fakultetit, ani pse ato ndodheshin në Qendrën për Punë Sociale në Pejë.
Sidoqoftë, rektori i Universitetit të Pejës, Armand Krasniqi, konfirmoi për KIKS-in se bazuar në pamjet e kamerave të sigurisë së këtij universiteti, vajzat nuk kanë qenë ditën e hënë në fakultet, por as më 23 shtator, ditën kur u zhdukën.
Krasniqi tha se është duke hulumtuar se pse u lëshua një dokument i tillë.
Për të hedhur dritë mbi rrethanat e zhdukjes dhe gjetjes së të rejave, KIKS Kosova ka kërkuar informacione nga Prokuroria Themelore në Pejë.
Nga burimet brenda Prokurorisë së Pejës, KIKSi ka mësuar se hetimet janë duke u zhvilluar në disa pista dhe deri tani janë intervistuar disa persona të cilët dyshohen se mund të kenë qenë me vajzat gjatë kësaj kohe.
Këto burime i kanë thënë KIKS-it se njëra nga pistat që po hetohet është edhe mundësia se vajzat mund të kenë qenë pre e trafikimit.
Në anën tjetër, policia ka refuzuar që t’i përgjigjet KIKS-it rreth hetimeve policore për këtë rast, por nuk e ka mohuar e as pohuar informacionin që vajzat u paraqiten në stacion policor, vetëm pak orë para se të fillonte aksioni i policisë për gjetjen e tyre.
Të tjera
-
Dy tërmete të njëpasnjëshme godasin Greqinë
Dy tërmete kanë goditur mëngjesin e ditës së premte Greqinë. Sipas mediave...
-
Sot mblidhet Kryesia e Kuvendit
Sot do të mbahet mbledhja e radhës e Kryesisë së Kuvendit. Në rend dite vo...
-
Haxhiu: Jemi gati për zgjedhje, edhe të dielën e ardhshme nëse dëshiron opozita
Edhe Ministrja e Drejtësisë, Albulena Haxhiu ka sfiduar opozitën, duke thënë ...
-
Vazhdojnë kërkimet për gjetjen e një personi të zhdukur në Leposaviq
Shoqata e Kosovës për Kërkim dhe Shpëtim ka bërë të ditur se po vazhdojnë kër...
-
Po shkonin në një konferencë që mbahej për Pashkët, autobusi bie nga shkëmbi, vdesin 45 pasagjerët! Shpëton mrekullisht vajza tetë vjeçare
Dhjetra besimtarë vdiqën pasi një autobus që shkonte për në një konferencë të...
-
Lumir Abdixhku kandidat i LDK-së për kryeministër
Lumir Abdixhku kandidat i LDK-së për kryeministër Kryetarja e Forumit të G...
-
Abazoviq: Vota kundër Kosovës e Malit tw Zi tregon realitet të ri
Ish-kryeministri i Malit të Zi, Dritan Abazoviq ka thënë se vota kundër Kosov...
-
Osmani e Statovci ishin për iftar në mensën e studentëve
Presidentja e vendit, Vjosa Osmani, bashkë me deputeten e Listës Guxo, në gru...
-
Mbahet ankandi elektronik për projektin solar prej 100 MW
Ministria e Ekonomisë do të mbajë ankandin elektronik për projektin e parë so...
-
Sot mblidhen dy komisione të Kuvendit
Komisioni për Buxhet, Punë dhe Transfere, si dhe ai për Administratë Publike,...
-
Nënshkruhet sot marrëveshja Kosovë-Mali i Zi për IPA III
Zëvendëskryeministri Besnik Bislimi dhe ministrja për Çështje Evropiane të Ma...
-
Moti në Kosovë me diell
Për sot në Kosovë parashikohet të mbajë mot kryesisht me diell dhe i ngrohtë....