Kompania Microsoft u ka ofruar pagat e njëjta çdo personi që i bashkohet atyre nga kompania e zhytur në krizë, OpenAI.

Sam Altman u shkarkua në mënyrë kontroverse nga posti i CEO-s të premten, duke çuar kështu në një ofertë pune në Microsoft për të drejtuar “një ekip të ri të avancuar për AI (inteligjencë artificiale)”, raporton BBC, transmeton Klankosova.tv.

Pothuajse secili pjesëtar i stafit në OpenAI ka kërcënuar me largim nëse ai dhe bashkëthemeluesi Greg Brockman nuk kthehen në vendet e tyre të punës.

Është ende e paqartë nëse Altman do t’i bashkohet përfundimisht Microsoft-it, kompani e cila është investitori më i madh i OpenAI deri më tani.

Evan Morikawa, një menaxher në OpenAI, ka thënë se 743 nga 770 punëtorët e OpenAI kanë nënshkruar një letër duke i bërë thirrje bordit të dorëhiqet – ndërsa edhe vetë stafi ka kërcënuar me largim nëse nuk u plotësohen kërkesat.

Në letër ata thonë se u janë ofruar vende pune në Microsoft – diçka që zyrtari kryesor teknik i gjigandit, Kevin Scott, e ka konfirmuar tashmë, duke i thënë stafit se “nëse është e nevojshme” ata do të punësohen nga Microsoft-i në një rol që “përputhet me kompensimin tuaj”.

Ndërkaq, Kryeshefja ekzekutive e përkohshme e OpenAI, Mira Murati planifikon të ri-punësojë paraardhësin e saj të shkarkuar Sam Altman dhe ish-presidentin Greg Brockman në një cilësi që ende nuk është finalizuar, sipas njerëzve me njohuri të drejtpërdrejta për këtë çështje, ka raportuar dje “Bloomberg”.

Murati, e cila mori detyrën të premten pasi bordi shkarkoi Altmanin, po negocion me Adam D’Angelo, CEO i Quora Inc., i cili po vepron si përfaqësues i bordit OpenAI, tha se njerëzit kërkuan të mos identifikoheshin sepse negociatat janë private dhe po vazhdojnë. Brockman, i cili ishte gjithashtu anëtar bordi, dha dorëheqjen në shenjë proteste disa orë pas largimit të Altman.

Edhe pse Murati po punon për të rikthyer Altman dhe Brockman, anëtarët e bordit të OpenAI po kërkojnë gjithashtu të punësojnë CEO-n e tyre për të pasuar Altmanin, tha për “Bloomberg” një person me njohuri të drejtpërdrejta me zhvillimet. Zgjedhja e një CEO tjetër do të vinte si një qortim thumbues për investitorët, të udhëhequr nga Microsoft Corp. dhe Thrive Capital, të cilët i kanë kërkuar bordit të largohet dhe duan që Altman të rikthehet në detyrë. /Klankosova.tv

Studio MASTER në UNI, Merr Diplomë dhe lejeqëndrim t’përhershëm në GJERMANI

Sponsoruar